Karemo Wiki 1 Katenibong
Warekan ana Boki te burabeti ae Iona.. 3: 1 – 10
E roko iroun te burabeti ae Iona ana taeka te Uea ae kangai: “Teirake, nako Niniwe ae te kawa ae ababaki, ao kaongoia ae N na tuangko.” Ao e teirake Iona, ao e nako Niniwe, n ai aron ana taeka te Uea. Ao bon te kawa ae moan te ababaki Niniwe, ba tenibong te bong te nakonako i aona. E rin Iona i nanon te kawa, ao e nakonako te bongina. Ao e taetae ni kangai: “Ai ti abui riki te bong, ao e na uruaki Niniwe.” Ao a kakoaua te Atua kain Niniwe; a katanoata te aki mamatam, ao a rabunia n te bua, mairouia ake a kakanato ni karokoia ake a mangori. E roko rongorongona iroun uean Niniwe, ao e teirake mani kaintokana n uea, ao e kaki rabunana, ao e rabunna n te bua, ao e tekateka i aon te mannang. Ao e takaruaeaki i Niniwe ana moti te uea ma ana mataniwi, ao e katanoataki ni kangai: “A na aki katonga te bai teuana aomata, ma man aika ababaki ma aika uarereke, ao a na aki amamarake ao a na aki moi n te ran. A na rabunia n te bua, ao a na kanenei banaia n takarua nakon te Atua, ao a na rairaki nako man aroia aika bubuaka ao man aia bure ake a karaoi. Antai ae ataia ngkana tao e bitaki nanon te Atua ao ngkana tao E kaki ana iango ma ni koerikaki man unna ae urarake, ba ti aonga n aki mate?” Ao E nori aia makuri te Atua ba a kaki aroia ake a bubuaka, ao e bitki nanon te Atua man ana moti ni karekekai are E taekinna nakoia, ao E aki kakoroa bukina.
Te Taramo 51: 1 – 2, 10 – 11, 16 – 17
Kaekana: Atuau, karika nanou ae itiaki.
Atuau, nanoangaai n am akoi, kabarai au bure ba Ko bati n nanoanga.
Tebokai mani buakakau, kaitiakai man au bure. K.
Atuau, karika nanou ae itiaki, karina irou te iango ae matoa,
tai kararoaai ma matam, tai ana mairou tamneim ae raoiroi. K.
Ko aki kukurei n te angakarea, Ko rawa n te karea ni kabuokaki.
Au karea ngai, te nano ae uruaki, Ko aki rawa nakon te nano ae uruaki, ae raraoma. K.
Imain te Euangkerio
Okirai ma nanomi ni koaua, ba I akoi man nanoanga.
Euangkerio
Warekan ana Euangkerio Ruka. 11: 29 – 32
E karibaki rarikini Iesu irouia aomata ake a maiti, ao E taetae ni kangai: “Bon te roro ae buakaka te roro aei; e tangira te kanikina, ma akea te kanikina ae e na anganaki, ba ti te kanikina ae Iona. Ba ai aroni Iona ngke e riki ba te kanikina i bukia kain Niniwe, ao ai aron naba Natin te aomata: E na riki ba te kanikina i bukin te roro aei. N tain te motikitaeka e na teirake neiere ueani Maiaki ma aomatan te roro aei, ao e na kabuakakaia, ba e mananga mai tabon aonaba ba e na ongora ni wanawanan Toromon, ao boni iai ikai ae kakanato riki nakon Toromon. N tain te motikitaeka a na teirake kain Niniwe ma te roro aei, ao a na kabuakakaia ba a rairi nanoia n ana taeka Iona, ao boni iai ikai ae kakanato riki nakoin Iona.”
Tibatiba: Tera ae kakawaki riki nakon Toromon ao Iona?
Tariu ao maneu bon aio te titiraki ae I kan kateia nakoira ba kananoan ao kamatoan nanora inanon ara kekeiaki ni maiura n irira Iesu. Te titiraki aio e kawenakoira ba ti na ataia raoi ba tera te oinibai ae kakawaki ae ngaia ae kamatoai nanora n ara kekeiaki. N te ewangkerio ao ti ongo aron unin Iesu nakoia ana reirei ngke E kangai;”Bon te roro ae buakaka te roro aio ba e tangira te kanikina”, Eng otau n unin Iesu aio bon ibukina ba aki kona n onimaki te roro aio ba a tangira n tai nako te kanikina are bon te kakai ae kamimi ae riki ao n noraki ba aonga n ringaki nanoia ao a na kakoaua. Bon aorakira n tai nako aio ba ti tangira te kakai ae na reke ba ti aonga ni kakoaua. A rangi maiti aika I a tia ni kaitibo ma ngaia ao I a tia n tuangia baa i tera ae a kainnanoia ba E na karaoia Iesu ba a aonga n rairaki nanoia? Bon tiaki aio ae e kantaningaia te Atua mairoura ma bon te nano ae marau ae tauraoi ni kakoaua ngkana e tuangaki te rongorongo.
Ti nanori kanoan te moan wareboki ao te ewangkerio n te bong aio ba ti na karekei tibangara mai iai. N te ewangkerio ao ti ongora aron te uea n aine mai Tieba are mananga mai mai abana ae raroanako i Maiaki ni kawara Toromon ba e na kakoaua raoi n taningana ao matana aron wanawanan te uea ae Toromon. E a bon ongongo naba taekana neiei ao e a toki nanona ngke a roko iroun Toromon ba e a bon kakoaua aron wanawanana ma rabakauna. E oti iroun te uea n aine aio ba e mananga n ukera te aomata ae Toromon ma e aki kakaea te Uea are E angan Toromon te wanawana. Bon aio te oinibai are e aki reke iroun te uea n aine aio. Ngkanne n te moani wareboki are taekan kanakoan te burabeti are Iona iroun te Atua ba e na karokoa te rongorongo irouia kain Ninive are taekan te rairannano ba e nang kamaunanakoa Nonove. E oti ikai ba uean Ninive e kakoaua te rongorongo are uotia Iona ba bon mairoun te Atua. Bon akea kainanoan te kanikina iroun te uea ma e waekoa ni kairia ana botanaomata nakon te rairannano ba muina ao a na bane ni maunanako ma abaia ae Ninive. E oti ikai ngkanne ba ti rai ni katotonga uea n Ninive ni waekoa ni kauka nanona nakon te oi n rongorongo are bon te Atua are kanakoa Iona ba e na nikira te rongorongo i Ninive. E ure matan te uea n nora are te oinibai are uotia Iona are bon te kamaiuaki mairoun te Atua.
Ti na bubuti ba ti na anganaki te ukinnano n te karemo aio n tauraoi n ongo banan Iesu are weteora nakon te rairannano ba e aonga n reke iroura are bon te oinibai are bon te maiu ao te kabaia ae aki totoki i Karawa.