Karemo Wiki 1 Kaabong.
Warekan te Boki ae taekan Etita 4: 17
E ukera buokana iroun te Atua neiere te uea ae Etita, i nanon te kabuanibai are bakaria. E butia te Uea ae Atuaia Iteraera ni kangai:
Au Uea, ae Atuara, ae ti Temanna, nakomai, buokai, ba akea raou ao akea buokau, ba ti Ngkoe, ao N nang kaburea maiu.
I a tia n reireiaki mangke I uarereke i nanon au utu, ba boni Ngkoe te Uea are Ko rinea Iteraera i buakoia botanaomata nako ao ara bakatibu i buakoia aia ikawai nako ba am botanaomata n aki toki, ao Ko kakoroa bukin am taeka irouia.
Uringnga, te Uea, kaotiko n ara tai n rawawata.
Ao ngkai, anganai te nanomaka, Ngkoe aia Uea atua ao mataniwia tan tautaeka. Karina i nanoni wiu te taeka n anai nano ngkana I kaitara te raian; raira nanona nakon ribakin ara kairiribai, ba e aonga ni kabuanibai iai, ngaia ma raona.
Ao ngaira, kamaiuira ni baim, ao nakomai, buokai, ba akea raou, ao akea arou, ba ti iroum Ngkoe te Uea.
Te Taramo 138: 1 – 3, 7 – 8
Kaekana: I weteiko, te Uea, ao Ko kaekaai.
I katituaraoiko, te Uea, ma nanou ni bane, Ko ongo au taeka aika I atong;
I neboiko i mataia anera, I taromauri i matan umam ae tabu. K.
I katituaraoiko n am akoi ma am koaua, Ba e riaon taekam ae ti ongo;
Ngke I weteiko, ao Ko kaekaai, Ko kakorakora tamneiu. K.
Ko arora baim ni kamaiuai, A reke arou ni bane ni makam.
Te Uea, akea tokin am tangira, Tai kabua muin am makuri. K.
Imain te Euangkerio
Ukera te raoiroi, ao tiaki te buakaka,
Ba kam na maiu ao E na mena iroumi te Uea.
Euangkerio
Warekan ana Euangkerio Mataio. 7: 7 – 12
E kangai Iesu nakoia ana reirei: “Bubuti, ao kam na anganaki; ukeuke, ao e na reke iroumi; karebwerebwe, ao e na kaukaki nakoimi. Ba ane bubuti, ao e anganaki; ane ukeuke, ao e na reke irouna; ane karebwerebwe, ao e kaukaki nakoina. Antai iroumi ae na angan natina te atibu ngkana e bubuti te bwerena? Ke e na anganna te naeta ngkana e bubuti te ika? Ngkai kam rabakau n angania natimi baika raraoi, ngkami aika kam buakaka, ao ai bati ra riki nanon Tamami are i karawa n anga baika raraoi nakoia akana butia! Ma ngaia ae, te bai nako ae kam tangiria ni karaoaki nakoimi, ao karaoia naba nakoia aomata. Boni ngaia anne te Tua ma burabeti.”
Tibatiba: Ngke I weteiko, ao Ko kaekaai, Ko kakorakora tamneiu
Tariu ao maneu ko ataia ba e nang bane ngkai moan wikin te karemo ba ti a roko ngkai n te Kabong n te moan wiki ni karemo.Ko a tia ni karaua n iangoia ba tera tibangam ae a toa n reke inanon bong aika tia n nako n am karemo? N te bong aio I kan katurututua ma ngkami te botoniango ae kakawaki n tain ara karemo n te kibu ae kangai “Ngke I weteiko, ao Ko kaekaai, Ko kakorakora tamneiu”. Aio e bon anaki man te taramo n te bong aio ae I taku ba e na anganira te kantaninga ao te koaua ba e tauraoi te Uea n ongo n tai nako n ara wewete ao ni butmaira ni mamarara ao ara bure. E tauraoi n ongo ara bubuti ao ara kainnano riki ngkana ti namakina te maroa ao te maku.
E koaua ae n tabetai ao ti taku ba ti aki kainnanoa te Uea. Ma ti kauringaki n te bong aio ba ngkana akea te Uea inanon maiura ao ti riki ba ai aroia mate ngaira. Ti riai n nora aron te kananoanga ae ti mena inanona ngakana ti aki nim ma te boto are Iesu. Ti na riai n teirake naba n te bong aio ao n okira Tamara ae te Atua ae tauraoi ni butimaira n tai nako ao e tauraoi n anganira te rau, te raoi ao te kimareirei. Bon aio te tai ae angaraoi ibukin te rairannano. Ti na butimaea ana wewete te Uea nakoira ao ti na butia te Uea ba E na kaitiaki nanora ma tamaneira.
N te ewaangkerio ao ti kaungaki ba ti na okira te Atua ba ngkana ti bubuti ao ti na anganaki, ngkana ti karebwerebwe ao e na kaukaki nakoira ao ngkana ti ukeuke ao e na reke iroura. Irarikin are bon ara kekeiaki iroura n airi ma Uea inanon te karemo aio ao e bon riai ba ti na uaia ni mananga ma natira ao kain ara auti ao ara utu ba aonga n reke naba tibangaia ae tamaroa inanon tain te karemo aio. Ngkana ti wetea te Uea ao E na ongo banara ao a na kakorakoraki tamneira.