Wiki Kanimabong
Warekan ana Boki te burabeti ae Etekiera 18: 21 – 28
E kangai te Uea: Ngkana e kaki ana bure ni kabane teuare buakaka; ngkana e kawakin au tua ni kabane ma ni karaoa ae eti ma n raoiroi, ao e na boni maiu: e na aki mate. A na aki manga uringaki ana bure ni kabane aika e a tia ni karaoi, ao e na maiu i bukin te raoiroi are e a tia ni karaoia. Tao N na kukurei ni maten teuare buakaka? Bon ana taeka te Uea. Tiaki N na kukurei riki ngkana e raira nanona ma ni maiu? Ma ngkana e rairaki teuare raoiroi man ana raoiroi, ao ngkana e karaoa ae buakaka, ni kakairi ni bure ni kabne aika e karaoi teuare buakaka, ao tao e na maiu? E na aki manga uringaki ana raoiroi ni kabane are e a tia ni karaoia ma e na mate, i bukin ana aki kakaonimaki, ao i bukin te bure are e a tia ni karaoia. Tao ko na kangai: “E aki eti ana makuri te Uea.” Ma ongora, te utu ae Iteraera. E aki eti au makuri Ngai? Tiaki bon ami makuri aika aki eti? Ngkana e rairaki teuaere raoiroi man arona ae raoiroi, ba e na karaoa ae buakaka, ma e mate iai, ao e boni mate i bukin te buakaka are karaoia. Ngkana e rairiki te tia bure man ana bure, ba e na karaoa ae raoiroi ma ae eti, ao e riai ni maiu. E motikia ba e na kitan ana bure ni kabane ake e karaoi; ai ngaia ae e na maiu, e na bon aki mate.
Te Taramo 130
Kaekana: Antai ae na maiu, te Uea, ngkana Ko tau muini bure?
I weteiko, te Uea, man tabo aika nano, te Uea, ongo banau!
Anga taningam, nakon tangin au bubuti. K.
Ngkana Ko tau muini bure, te Uea, ao antai ae na maiu, te Uea?
Ma ane iroum te kabara bure: Ko karineaki iai. K
E kantaninga te Uea tamneiu, I onimakina ana taeka. I onimakina riki te Uea
nakon te tia tantani n onimakina te ngaina, E karia te ngaina te tia tantani, ke e karia te Uea Iteraera. K.
Ba ane iroun te Uea te nanoanga, ane irouna n ti Ngaia te kamaiu.
E na kamaiuia Iteraera, man ana bure ni kabane. K.
Imain te Euangkerio
Tiaki ti te bwerena maiu te aomata, ma bon ana taeka ni bane te Atua.
Euangkerio
Warekan ana Euangkerio Mataio. 5: 20 – 26
E kangai Iesu nakoia ana reirei: “I bon tuangi ngkami: ngkana e aki raka ami raoiroi nakon aia raoiroi tani korobki ma Baritaio, ao kam na bon aki rin n te Abanuea ae karawa.
Kam ongo ba e atongaki ae kangai nakoia bakatibu: ‘Tai kamamate.’ ao ngkana iai ae tiriaomata, ao e na bukinaki i matan te kabowi. Ao Ngai I taku nakoimi, ba ane un nakon tarina, ao e na bukinaki i matan te kabowi; ma ngkana e kangai nakon tarina: “Te baba!” ao e na bukinaki i matan te Tanirim; ao ngkana e kangai nakoina: ‘Te rang!’ ao e na kabureaki n te tai are i Keenna. Ma ngaia ae ngkana ko anga am karea n te baonikarea, ma ko uringnga iai ba iai tangin tarim iroum, ao katuka am karea ikanne i matan te baonikarea, ao nako moa, raoiakina tarim; ao i muina ko a oki n anga am karea. Kawaetatako, karekea te raoi ma aiam, ngkai ko mena naba in anon te kawai, ba e kawa ni kairiko aiam nakon te tia moti, ao e na kairiko te tia moti nakon te tia tantani, ao ko na karinaki n te auti ni kaikain. I bon tuangko te koaua: ko na aki otinako mai iai n ua barani baem ni kabane.”
Tibatiba: Ane e kawakin au tua ao e karaoa ae raoiroi ao e na maiu man aki mate
Inanon te karemo aio ao ti weteaki nakon te rairannano ba ti na manga okira te Uea. Iai te bai ae na riai n iai iroura ngkana ti ongo te wewete aio ao ti na kaeka. Eng te bai ae na riai iroura bon te onimaki n ana taeka ni kabane te Uea. Ao te onmaki tiaki n ti te bai ae ti kona n noria ma ngkana ti ongo ao ti kakoaua naba. Aio bon aron uean Niniwe are kakoaua te rongorongo are uotia Iona nakon abana.
N te bong aio ao ti a manga bon anganaki te rongorongo ae ti riai ni kakoaua are boni kawaira nakon te kamaiuaki. Bon aio te kawai ae ti na riai n onimakinna ba ngkana ti karaoia ao e na bon reke iroura te maiu ao ti na aki mate.
Eng e boni matata raoi ba tera ae ti riai ni karaoia n tain te karemo aio ba ti aonga ni kamaiuaki ba ti riai ni kawakina ana tua te Atua ao ti na karaoa ae raoiroi. Ao ngkana ti ataia ba ti a tia ni karaoa ae aki botau ma Nanon te Uea ke ti a tia ni bure ao ngkanne ti kauringaki n te ewangkerio n te bong aio ba ngkana ti uota ara karea nakon te baonikarea ao ti na uringa ae iai ara kairua nakon tarira ao ti riai ni katuka ara karea ao n oki moa n raoiakina tarira imain ae ti kateaki n te bowi ao e na motikaki taekara. Te reirei ae kakawaki ikai ba ngkana ti bure ao ti riai ni waekoa n raoiakinira ma te Uea n te Benetenia imain ae ti na mate ao ti na tei naba imatan Iesu ba a na motikaki taekara. Ao ngkana a motikaki taekara ao ti aki kona nu bubuti kabaran ara bure ba e toki taina.