Karemo Wiki 2 Moanibong
Warekan ana Boki te burabeti ae Taniera. 9: 4 – 10
Te Uea, te Atua ae ko kakannto ma ni kakamaku, Ko kawakina te berita, ao Ko akoia akana tangiriko ma ni kawakin am tua. Ti bure, ti karaoa ae aki riai, ao ti baina te aro ae buakaka; ti kitaniko, ao ti kaki am tua ma am moti. Ti aki ongo irouia am tabonibai aika burabeti, ake a taetae n aram nakoia ara uea ma ara mataniwi ma ara bakatibu, ao nakoia naba kain te aba ni bane. Te Uea, am bai te eti, ao ara bai te mama, n ai arora n te bong aei, ngaira aika aomatani Iuta ma kaini Ierutarem ao Iteraera ni bane, aika ti kaan ke ti raroa, aba nako ike Ko kakioira nako iai ngke ti aki kakaonimaki nakoim. Ana bai te Uea ae Atuara te nanoanga ma te kabara bure, ba ti kitanna, ao ti aki ongo banan te Uea ae Atuara, ma n aki ira nanon ana tua, n ai aron are E anganira irouia ana tabonibai aika burabeti.
Te Taramo 79: 8 – 9, 11, 13
Kaekana: Te Uea, tai kaboira n ai aron ara bure.
Tai bukinira n aia bure ara bakatibu, kawaetata am akoi nakoira,
ba a kani moti ikera. K.
Buokira, te Atua ae te tia kamaiu, i bukin neboan aram.
Te Uea, kabara ara bure, i bukin aram. K.
Ke a rotiko tangia taenikai, kamaiuia akana nangi mate, ni makani baim.
Ti na katituaraoiko ngaira, n aki toki,
ngaira am botanaomata ma tiibun am nanai. Ti na kaota neboam i nanon roro nako. K
Imain te Euangkerio.
A kabaia akana kawakina te taeka n te nano ae raoiroi: a kariki ua n te nanomatoa.
Euangkerio
Warekan ana Euangkerio Ruka. 6: 36 – 38
E kangai Iesu nakoia ana reirei: “Kam na nanoanga n ai aron Tamami ae nanoanga. Tai motiki taekaia aomata, ao a na aki motikaki taekami. Tai kabureia aomata, ao kam na aki kabureaki. Kabarai aia bure aomata, ao a na kabaraki ami bure. Anga, ao kam na anganaki, ao a na kanoaki rukuman ami kunnikai n te baire ae kororaoi ae ibe, ae toki, ae taonako; ba te baire ae kam babaire iai, ao e na baireaki naba iai nakoimi.”
Tibatiba: Kabarai au bure ao nanoangai te Uea ba I kananoanga
Tariu ao maneu ti a roko n te ka-uoua ni wiki n ara karemo ao ai ti uoua riki te wiki imain toki te karemo. Ni kananoi tibangara aika ti na butimai n te ka-uoua ni wiki aio ao ti kan okirikaki nakon kanoan te bong are ngkoananoa. N taian wareboki ao n te ewangkerio ao ti ongora aron Aberaam n teimatoa n onimakina te Atua ao ni makua ngkai boni Ngaia te Atua ae aki kona ni kairua mani karaoa te makuri n aonikai nakoira ao a bane n eti n tai nako ana babaire.
Ti nora nanon Aberaam are kanoabo ao e a bon tia naba ni kitana ana tai ni kariki ao e teimatoa n onimakina te Atua are E tuanga ba e na nakon te tabo ae Moorea ba e na kareana iai natina ae te riktemanna ae Itaaka. E ngae ngke bon ti temanna natina ao e tauraoi naba n tiringnga ba e maka riki te Atua. Ngke e nang tiringa natina ao akea ba e kaoti naba nakoina ana anera te Atua man n tuanga ba e na aki katokai baina iaon te ataei ngkai E a ataia te Atua ba e ongotaeka man onimakinna Aberaam e ngae ngke e ataia ba e nang akea natina are ti temanna ba e na manga tiringa ni kareanna nakon te Atua.
Ma teuana riki te bai ae kamimi ae kaota iai nakoira ana kantaninga te Atua ibukin ana tangira ae kororaoi nakon te botanaomata ae Iteraera ao ana berita n akoi nakoia aomata nako. Ba ngke e tauraoi ni kamatea natina Itaaka ae te rikitemanna ao e kaota ana kantaninga te Atua ba E na kanakoa Natina ae te Rikitemanna ae Iesu ba E na riki ba te tibu te Tei ae na mate n riki ba te angakarea ibukin kamaiuakia te botanaomata. Te kamaiuaki aio bon man kabaran ara bure ba uan marakin ao maten Iesu iaon te Kaibangaki,
N te bong aio ao ti bon riai n nori aron kananoangara ngkana ti tiku n arora ni bure ao n raroa nako mairoun te Atua ao kainanoan ana kamaiu te Atua ba ti aonga ni manga natinaki iroun te Atua. Ti riai n rairi nanora ba ti na kakaroa nanon te Atua ae tabu ae ti kauringaki n te bong aio ba ti riai ngaira n tauraoi ni kabarai aia bure raora ba a aongan naba ni kabaraki ara bure. Te kauoua ni bai bon te aki waekoa ni motiki taekaia raora ba a aonga naba n aki motikaki taekara. Te kabanea ni bai bon te tauraoi n ibuobuoki ao n anganga naba nakoia tarira ma manera. Ba ngkana ti tauraoi n anga ni kabane are iai iroura ao te Atua E na tauraoi n anganira kororaoin ana tangira ma ana nanoanga ae riaon are ti kantaningaia. E kakawaki ngkanne ba bai nako are ti kantaningaia mairoun te Atua ti riai naba n tauraoi moa ni karaoia nakoia tarira ma manera.