Wiki 13 Kaabong
Warekan te Boki ae Karikani bai. 22: 1-19
E kani kata Aberaam te Atua, ao E kangai nakoina: “Aberaam, Aberaam!” Ao e taku aBeraam: “Aei ngai.” E taku te Atua: “Ana natim ae am rikitemanna, ae ko tatangiria, ae Itaaka, nakon te aba ae Moria, ao ko na kareanna iai b te karea ni kabuokaki, i aon te maunga ae N na kaotia nakoim.”
E teirake Aberaam n te karangaina, ao e kabaea ron ana man te aaati, ao e kairiia ana tabonibai aika uoman ao natina are Itaaka. Ao bwenabwena te aia i bukin te karea, ao e mananga nakon te tabo are E kotoia te Atua. N ana katenibong, ao e tararake Aberaam, ao e nora te tabo arei mai ike e raroa. Ao e taku Aberaam nakoia ana tabonibai: “Kam na tiku ikai ma te aati, ao ngai ma natiu, ti na nako ikekei ba ti na taromauri, ao ti na okiri ngkami.”
E ana te aia Aberaam i bukin te karea ni kabuokaki, ao e katoka i aoni Itaaka, ao ngaia e uota te ai ma te biti, ao a uaia ni mananga. E taetae Itaaka nakon tamana ae Aberaam ni kangai: “Tamau!” Ao e taku Aberaam: “Tera natiu?” E kangai Itaaka: “Aei te ai ao te aia, ma e nga te tibutetei i bukin te karea?” E taku Aberaam: “Natiu, E na bon iangoia te Atua.” Ao a uaia n nakonako.
Ngke a roko n te tabo are E kotoia te Atua, ao e katea te baonikarea Aberaam, ao e katoka te aia i aona, ao e kabaea natina ae Itaaka ni katokaa n te baonikarea i aon te aia. Ao e arora baina Aberaam ao e ana te biti ba e na tiringa natina.
Ma e weteia ana anera te Uea mai karawa ni kangai: “Aberaam, Aberaam!” Ao e taku Aberaam: “Aei ngai.” E kangai te anera: “Tai katoka baim i aon te ataei, ao tai ringnga. I ataiko ngkai ba ko maaka te Atua: ko aki rawa n anga natim ae am rikitemanna.” Ao e tararake Aberaam, ao e nora te tiibu mane ae reke korona i buakon te kai, ao e nako n anaia Aberaam, ao e kareanna n onea muin natina. Ao e arana te tabo anne Aberaam ba “E iangoia te Uea.” Ai ngaia ae e atoatongaki ngkai ae kangai: “E iangoia te Atua i aon te maunga.”
E manga wetea Aberaam ana anera te Uea, ao e kangai: “I bon kaotioti ba bon ana taeka te Uea: ngkai ko karaoa anne, n aki rawa n anganai natim ae am rikitemanna, ao N na kabatia kabaiam, N na kamaitiia am kariki n ai aroni itoini karawa ma biken tari, ao e na taona korakoraia ana kairiribai am kariki. A na bane ni kabaia te botanaomata aonaba n am kariki, kioina ba ko ongo irou.”
E okiriia ana tabonibai Aberaam, ao a uaia ni mananga nako Beerateba. Ao e maeka Aberaam i Beerateba.
Te Taramo 114: 1-6, 8-9
Kaekana: N na nakonako I matan te Uea I abaia akana maiu
E reke tangiran te Uea irou, Ngke E ongo au tataro,
Ba E anga taningana, Ngke I weteia. K.
A tierai ana kabaebae te mate, Ao ana karaun mone;
I taonaki n te rawawata ma te nanokawaki, Ao I wetea aran te Uea.
Te Uea ae Atuau, kamaiuai. K.
E eti te Uea, ao E nanoanga, E akoi Atuara.
E kawakinia akana mangori: E kamaiuai ngke I mamara. K.
E kawakina tamneiu man te mate, E tuka rannimatau
ma tibanakoni wiu. K.
Alleluia, alleluia.
Butimaea ma te nanoraoi te taeka ae unikaki i nanomi,
Ba e kona ni kamaiu tamneimi. Alleluia.
Euangkerio
Warekan ana Euangkerio Mataio.9: 1-8
E toka n te boti Iesu n riaon te nama, ao E roko n ana kawa. Ao akea ba e uotaki nakoina temanna te nakibaina i aon te kainiwene. Ngke E nora aia onimaki Iesu, ao E taku nakon te nakinbaina: “Natiu, karaua nanom, a kabaraki am bure.” A taku tani koroboki tabeman i bon irouia: “E bakanatua Teuanne.” Ma E atai aia iango Iesu, ao E taku: “E aeraa ngkai kam iangoa ae buakaka i nanomi? Tera ae bebete riki atongana, ‘A kabaraki am bure’ ke ‘Teirake ao nakonako?’ Ma kam aonga n ataia ba iai makan natin te aomata ni kabarai bure i aon te aba – ao E kangai nakon te nakibaina – teirake, tabeka am kainiwene ao nakon am auti.” Ngke a nora anne te koraki, ao a rotaki n te maku, ao a neboa te Atua, ngkai E angania aomata te aeka ni maka anne.
Tibatiba: Tera te bai ae ti kainnanoi mairoun Iesu? Kabaran ara bure ke kamaiuara man aorakin rabatara?