Wiki 13 Kanimabong
Warekan te Boki ae Karikani bai. 23: 1-4, 19; 24: 1-8, 62-67.
Ananauni maiun Tara tebubua uabui ma itiua ana te ririki. Ao e mate I Kiriata-areba, ae bon Eberon, n te aba ae Kanaan. Ao e rin Aberaam ba e na nanokawaki ma n tanginiweneia.
E teirake Aberaam mai matan te mate, ao e taetae nakoia natin Eta ni kangai: “Bon te irua ngai i buakomi. Kam na anganai te aba teuana i bukin te taunimate, ba N na uota nako au mate n taunna.”
Ao e tauna buna ae Tara Aberaam i nanon te nangananga are i abani Makebera, ni kaitara Mamre, n te aba ae Kanaan.
E a unimane Aberaam ngkekei, ao e a kara, ao e a tia ni karaoiroaki iroun te Uea ni bai ni kabane. E taku Aberaam nakon ana toro ae te ikawai riki n ana auti, ae te tia tau muin ana baire ni kabane: “Kamena baim i an rangau, ao taetae n tuea iroun te Uea ae Atuani karawa ma Atuan aonaba, ba ko na aki karekea bun natiu irouia aika natina i Kanaana, aika I maeka i buakoia. Ma ko na nako abau ao nakoia au utu, ao ko na karekea iai bun natiu ae Itaaka.” E taku te toro nakoina: “Ngkana tao e rawa ni iri te aine arei, nakon te aba ae ko na nako mai iai.” E kangai Aberaam nakoina: “Ko na bon aki kaoka natiu nakon te tabo arei. E tia ni kairai te Uea ae Atuani karawa ma aonaba man ana auti tamau ao man abaia au utu, ao E a tia n taetae n tuea nakoiu ba E na anganai te aba aei ma au kariki. E na kanakoa ana anera te Uea i maim, ba ko na kareke bun natiu ikekei. Ngkana tao e rawa ni iriko te aine, ao ko a bara man te taetae n tuea nakoiu. Ma ko na bon aki kaoka natiu nakon te tabo arei.”
E roko Itaaka n te rereua, n te maniba ae Raai Roi, ba e maeka i Nekebo. Ao e otinako Itaaka n te tairiki teuana, ba e na nakonako i nanon te tawana; ao ngke e taratara nako, ao e noriia kamero ake a nakomai. Ao e taratara nako Rebeka, ao e nora Itaaka. E ewe nako mai aon ana kamero ao e titirakina te tabonibai ni kangai: “Antai te aomata ane nakomai n te tarawa ni kawarira?” E taku te tabonbai: “Bon au toka.” Ao e ana rabunana ni karaba matana. Ao e kaongoa Itaaka ba te tabonibi taekani bai nako ao e kaira Rebeka Itaaka nakon umana, ao e anaia ba buna, ao e tangiria. Ao e bebete iai nanon Itaaka ni maten tinana.
Te Taramo 105: 1-5
Kaekana: Katituaraoa te Uea, ba E akoi.
Katituaraoa te Uea, ba E akoi, Akea tokin ana tangira.
Antai ae na taekin ana makuri te Uea? Antai ae na katanoata mimitongina? K.
A kabaia akana kawakina te eti, Akana karaoa ae riai n tai nako.
Uringai, te Uea, Ngkai Ko tangira am botanaomata. K.
Kawarai ma am kamaiu, Ba a na nori kabaia am botanaomata,
Ao N na neboaki ma am aomata. K.
Allleuia, alleluia.
E teimatoa n aki toki ana taeka te Uea; Bon te Rongorongo ae Raoiroi ae kam anganaki. Alleluia.
Euangkerio
Warekan ana Euangkerio Mataio.9:9-13
E otinako Iesu, ao ngke E nakonako, ao E nora temanna te aomata ba e tekateka n te tabo n angabai, ao arana Mataio. E taku nakoina: “Ko na irai.” Ao e teirake naba ni iria. Ngke E amarake i nanon te auti, ao a roko bobirinako ma tani bure ake a maiti ba a na amarake ma Iesu ao ana reirei. Ngke a nora anne Baritaio, ao a kangai nakoia ana reirei: “E aera ami Tia Reirei ngkai E amamarake ma bobirikano ao tani bure?” E ongo Iesu, ao E taku: “A aki kainnano iroun te tia katoki aoraki aomata aika marurung, ma bon akana aoraki. Ma ngaia ae kam na nako, ao reirei ngkami nanon te taeka ae kangai: ‘I tangira te nanoanga, ao tiaki te angakarea. Ba I roko ni weteia tani bure, ao tiaki akana raoiroi.”
Tibatiba: I tangira te nanoanga, ao tiaki te angakarea. Ba I roko ni weteia tani bure, ao tiaki akana raoiroi