Katenibong Wiki 14
Warekan te Boki ae Karikani bai. 41: 55-57; 42: 5-7, 17-24
E namakinaki te rongo n te aba ae Aikubita ni kabuta, ao e takarua te botanaomata ni butia Barao te amarake. Ma e kangai Barao nakoia I Aikubita ni kabaneia: “Nakoni Ioteba, ao karaoa ae e na tuangi ngkami.” Ao e buta aonaba n te rongo. Ngkanne e kauki nneni uita Ioteba, ao e kaboa te uita nakoia I Aikubita. E rikirake korakoran te rongo n te aba ae Aikubita. A roko i Aikubita aomata mai aonaba ni kabane ba a na kaboa te uita irouni Ioteba, ba e a rikirake korakoran te rongo i aonaba ni kabuta.
A nako naba natini Iteraera i buakoia tani mananga, ba a na kaboa te uita, ba e taonaki naba n te rongo te aba ae Kanaan. Iai makani Ioteba n te aba arei, ao boni ngaia are kaboa nako te uita nakoia te koraki. Ngke a roko tarini Ioteba ao a bobaraki i aontano i matana. Ngke e noriia tarina Ioteba, ao e kinaia. Ao a kainia ni kabane iai nanon tenibong.
I muin tenibong, ao e taku Ioteba nakoia: “Aei aromi ngkana kam kani maiu, ba I maka te Atua. Ngkana a koaua nanomi, ao ke a tiku tarimi temanna ni kabaeaki n te tabo aei, ao ngkami, kam na mananga ni uota te uita nakoia ami utu aika kainnano. Kam na kaira mai nakoiu tarimi are te bina. Ngkanne a na kakoauaki ami taeka, ao kam na aki mate.” Ao a ira nanona. Ao a kangai i boni irouia: “Te Koaua, a reke kaira ngkai i bukin tarira. Ti nora rawawatan nanona ngke e butira te nanoanga, ao ti aki kan ongo. Ai ngaia ae e bakarira te rawawata aei.” E taku Reuben nakoia: “Tiaki I bon tuangingkami ngkekei ba kam na aki buren nakon te Ataei? Ma kam aki ongo, ao ngkai e ukeraki boon rarana mairoura.” A aki ataia ba e ongo aia taeka Ioteba, ba iai te tia raitaeka I marenaia. Ao e kitania, ao e tang.
Te Taramo 32: 2-3, 10-11, 18-19
Kaekana: Nanoangaira te Uea ba ti onimakiniko
Katituaraoa te Uea ma te abi, Katanga te raea ae tengauni karaina.
Aneneia n te kuna ae bou, Rungarungaia n ami katangitang.K
E urua aia baire aomata te Uea, E tuki aia iango botanaomata.
Ma e teimatoa ana baire te Uea, ao motin nanona n roro nako. K
E tarataraia akana Makua, te Uea, Akana onimakina ana akoi,
E kawakin tamneia man te mate, E karekei maiuia n taint e rongo. K
Alleluia, alleluia.
Atuau, reireiai am kawai, Kairai i nanon am koaua. Alleluia.
Euangkerio
Warekan ana Euangkerio Mataio. 10: 1-7
E weteia ana reirei ake tengauni ma uoman Iesu, ao E angania te maka i aoia tamnei aika kamara ao te maka ni kanakoia ma ni katoki aoraki ma mamara ni kabane. Aikai araia Abotoro ake tengauni ma uoman: Timon moa, ae aranaki ba Betero, Anterea are tarina, Iakobo ae natin Tebetaio, tarina ae Ioane, Biribo, Batoromaio, Toma, Mataio ae te bubirikano, Iakobo ae natin Arebaio, Tataio, Timon ae te I Kanaan, ao Iuta itikariota ae na kamanea. E kanakoia uake tengauni ma uoman Iesu, ao E reireinia ni kangai: “Tai toua kawaia bekan, tai rin n aia kawa I Tamaria ma kam na nakoia tiibun te utu ae Iteraera aika bua. I nanoni kawaimi, ao kaotiotia ba e a kan te Abanuea ae Karawa.”
Tibatiba: Nanoangaira te Uea ba ti onimakiniko
Tariu ao maneu ao bon aio te tataro ae moan te tikiraoi ba kaotan te nanorinano iroura n ataia ba iai ae ti kainnanoa an buoka ma ana kamaiu inanon maiura. Ti ataia ba iai temanna ae korakora mani maka riki nakoira ao ti ataia ba akea ara kona i bon iroura ni kaitarai kanganga aikai. Te bai riki teuana ae kakawaki te tataro aio ba bon te onimaki ao te koaua ba akea riki ae ti kona n tan nakoina ba bon ti Iesu ae te Atua ae maka mani korakora ae onrake n te tangira ao te nanoanga ao e na bon aki kona n rawa ni kaekai ara bubuti ao e na bon ongo ara bubuti.
Tariu ao maneu inanon te tataro aio ao e na bon akea te barannano ao te nano uoua iroura ao ti riai ni katikui ara onimaki ma ara koaua ba ti bon aki kona n rota wanwanan ao makan ma korakoram te Atua ngkai boni ngaira ana karikibai. Are nanona ngkanne ba bon ara bai n tai nako ba ti na riki ba toro ngaira ao e na riki te karikibai ba ara Uea ma Atuara. Bon iai riki te bai teuana ae ti riai n ota iai ngkana ti bubut nakon tr Atua ba ti na riai n onimakina te Atua ba E na bon klaekai ara bubuti. N aron ae ti bon ataia ao ngaira aomata ti taku ba a kaekaki ara bubuti ngkana a reke baike ti bubuti n aron are ti bubuti iai. Ao ti taku ba aki kaekaki ara bubuti ngkana aki reke baike ti bubuti n aron are ti bubuti iai.
Ma iai te bai ae ti maninga ba ti taku ba ti wanwana riki nakon te Atua ngaia are ti tuanga te Atua ba e na kanga aron kaekan ara bubuti. Eng ti riai n onimakina te Atua ba bon Ngaia te kororaoi n ana tangira ma ana nanoanga ao Ena kaekai ara bubuti n aron ae E noria ba te kabanea n tamaroa ibukira.