Wiki 17 Moanibong
Warekan te Boki ae te Otinako. 32: 15-24, 3-34
E ruo rikaki Mote mai aon te maunga ma uoua te baba n atibu i nanoni baina, ake atibun te tua, ake a korobokiaki iteraia aika uoua, ba iai te koroboki i aoia ma akuia. Bon ana makuri te Atua atibu akekei, ao bon ana koroboki te Atua are kataneaki i aon te atibu.
E ongo takaruaia te koraki Iotua, ao e taku nakoni Mote: “Iai karongoan te buaka i nanon te maeka n rianna.” E taku Mote nakoina: “Tiaki te anene n tokanikai, ao tiaki te tang n taenikai; ma I ongo te bana n anene.”
Ngke a kania te maeka n rianna, ao a nora te kao te tei ma aia koraki tan ruoia; ao e urarake n un Mote. E tewenakoi atibu ake i nanoni baina ao e ibeibei i rarikin te maunga. E ana te kao te tei are a karaoia, ao e kabuokia, ao e ikikia ni kamantintia, ao e kabaroa i aon te ran, ao e kamooiia iai natini Iteraera. E taku Mote nakon Aaron: “E iraniko te botanomata aei ngkai ko katoka te bure ae rawawata i aona?” E kangai Aaron nakoina: “Ke e tai un au uea, ko bon ataia aomata aika ba a kani kakaraoa ae buakaka. Boni ngaia ake a kangai nakoiu: “Karaoa atuara temanna ae na nakonako n rimoara, ba ti aki ataia ba tera ae riki irouni Mote are kairira rake man te aba ae Aikubita.” Ao I taku nakoia: “Antai ane iai ana koora?” ao a karekea ma n anganai. I tewenakoa i nanon te ai, ao e a otinako te kao te tei aei.”
Ngke e a ingabong, ao e taku Mote nakoia te koraki: “E rawawata te bure ae kam karaoia. N na nako ngkai ni waerake nakon te Uea: tao N na kona ni kaboa muin ami bure.” Ao e okira te Uea Mote, ao e taku: “Ngaia e rawawata aia bure te koraki arei: a karaoa atuaia te koora. Ngke arona ba Ko kani kabara aia bure… Ngkana Ko aki, ao I butiko, kamaunaai man te Boki are Ko koroia.” E kangai te Uea nakoni Mote: “Ane bure nakoiu, ao boni ngaia ae N na kamauna man te Boki. Nako ngkai, kairiia aomata akanne nakon te tabo ae I a tia n tuangko. E na rimoam au anera; ma ngkana I kawariia, ao N na karekei kaia i bukin aia bure.”
Te Taramo 105: 19-23
Kaekana: Katituaraoa te Uea, ba E akoi.
A karaoa te kao te tei i Oreba, A bobaraki i matan te biti;
A kaki Atuaia ae mimitong I bukin tamnein te kao ae kang uteute. K.
A manuokina te Atua ae aia tia kamaiu, Are karaoi baika kakannato i Aikubita
ma kamimi i abani Kam, Ao kakai i Marawa ae Urara. K.
E kaotia ba E na kamaunaia, ma e tei i matana
Mote are E rineia, n tuka unna man te urubai. K.
Alleluia, alleluia.
A kabaia akana kawakina te taeka n te nano ae raoiroi, Ao a kariki ua n te nanomatoa. Alleluia.
Euangkerio
Warekan ana Euangkerio Mataio…13: 31-35.
E taetae ni kaikonaki Iesu nakoia aomata ni kangai: “Te Abanuea ae karawa, ai aroni koraan te makeke are e anaia te aomata n unikia i abana. Boni ngaia te koraa ae moan te uangingi i buakoni kora ni kabane; ma ngkana e a ikawairake, ao e ababaki riki nakoni kainamarake ni bane, ao e riki ba te kai, ao a roko mannikiba ni katania ni mangana.” E taekina te taetae ni kaikonaki riki teuana nakoia n kangai: “Te Abanuea ae karawa, ai aron te bai ni kariki burawa are e anaia te aine ni kaboa ma tenikuo te baire ni burawa, ni karokoa e a bane n riki.”
E taekini baikanne ni kabane n te taetae ni kaikonaki nakoia aomata, ao E aki taekina te bai teuana nakoia n aki taetae ni kaikonaki. E kakoroaki iai bukin ana taeka te burabeti ae kangai: “N na kaurea wiu n taetae ni kaikonaki; N na katanoatai baika karabaki mai moani karikan aonaba.”
Tibatiba: Ti na maraia ngkana ti taromauri bouannanti