Wiki 17 Kauabong
Warekan te Boki ae te Otinako. 33: 7-11; 34: 5-9, 28
E ana te Uman n rianna Mote, ao e kateia i tinanikun te maeka n rianna, ni kararoa ma te maeka. Ao e aranna ba te Uma ni Botaki. Ngkana iai ae kan titirakina te Uea, ao e otinako nakon te Uma ni Botaki i tinanikun te maeka n rianna. Ngkana e otinako Mote ba e na nakon te Uman ni Botaki, ao a bane n tei te koraki. E tei te aomata nako ni mataroan umana, ao e taratara Mote ni karokoa e roko n te Uma. Ngkana e rin iai Mote, ao e ruo te boua ae te nang n tei ni mataroan te Uma. Ao E taetae te Uea ma Mote. Ngkana e nora te boua ae te nang ba e tei ni mataroan te Uma, ao e tei te aomata nako ni bobaraki ni mataroan nako umana. Ao e taetae te Uea ma Mote ni kaitara, n ai aron te aomata ae taetaenikawai ma raona.
E ararakea te maunga ae Tinai Mote n te moa ni ingabong n ai aron ana taeka te Uea nakoina. Ao E ruo te Uea ni katotongan te nang, ao e tei Mote ma Ngaia iai. E wetea aran te Uea. Ao E ri matana te Uea ma n takarua ni kangai: “Te Uea, te Uea, ae te Atua ae atataiaomata ma n nanoanga, ae bati n akoi ma ni kakaonimaki; E kawakina ana akoi nakoia nga n aomata, ao E kabara te bure, te riaon tua ao te buakaka, ma E aki katuka te bai teuana n aki kaboa muina, ao E karekea kain aia bure karo irouia nati ma tibu ni karoko te katenroro ma te kaaroro.” Ao e baka Mote ni katorobubua ma ni bobaraki, ao e kangai: “Ngkana tao Ko boni kukurei irou, te Uea, ao I a butiko, ke E raonira au Uea. Bon aomata aika a matoatoa nanoia te botanaomata aei, ma Ko na kabarai ara bure ma buakakara, ao karikira ba ma taomata.”
Ao e tiku iai Mote ma te Uea abui te ngaina ao abui te bong n aki amaamarake ma ni momooi. Ao e koroi taekan te Berita i aon te atibu, ba taeka ake tebuina.
Te Taramo 102: 6-13
Kaekana: E akoi ma n nanoanga te Uea.
E makuri te Uea i bukin te eti, E iri tangaia akana rawawata.
E kaoti ana iango nakoni Mote, Ao ana makuri nakoia natini Iteraera. K.
E akoi man n nanoanga te Uea, E iremwe n un ao E bati n tangira.
E na bon toki unna, Iai tokini marakin nanona. K
E aki tiringira n ai aron ara bure, e aki kaboira n ai aroni buakakara.
Ba aron rietatani karawa i etan aonaba, ao ai aron naba korakoran ana tangira
i bukin ane makua. K.
Aron raroani mainiku ma maeao, ao ai aron naba kararoan ara bure irouna.
Aron te karo n akoia natina, ao ai aron te Uea n akoia akana makua. K.
Alleluia, alleluia.
Am taeka, bon taekan te tamnei ma te maiu, A mena iroum taekan te maiu ae aki toki. Alleluia.
Euangkerio
Warekan ana Euangkerio Mataio..13: 36-43
E kitania aomata Iesu, ao E nakon te auti; ao a roko ana reirei, ao a titirakinna ni kangai: “Tuangira nanon te taetae ni kaikonaki ae taekan te titania n te nne n aroka.” E kaekaia Iesu ao E taku: “Ane unika te koraa ae raoiroi, bon Natin te aomata. Te nne n aroka, bon aonaba. Te koraa ae raoiroi, bon natin te Abanuea. Te titania, bon natin teuare buakaka. Te kairiribai are unikia, bon te riaboro. Te bongi n tai, bon tokin aonaba. Ao tan tai, bon anera. N ai aron ae e taekaki te titania ma ni kabuokaki n te ai, ao ai arona naba n tokin aonaba: E na kanakoia ana anera Natin te aomata ba a na rikoi bai ni kabakabaka ma tani buakaka mai Abana n uea, ao a na tewenakoi i nanon te ai ae uramaka; e na mena iai te tang ma te kangenge wi. A na raneanea ngkanne n ai aron taai akana raoiroi i nanon Uean Tamaia. Ane iai taninga ao ke e ongo.”
Tibatiba: Te Aonnaba n Tamnei ao te Aonteaba
Bon tiaki te koaua ae aongkoa uoua te aonnaba ba te aonnaba n Tamnei ao aonteaba. Ba bon ti teuana te aonnaba ba Abanuean te Atua i aonteaba n aiaron are i Karawa. Are nanona ba Karawa bon reitan aonteaba ao ngaira aika ti maiu i aonteaba ti karikaki ba ti na roko n abara ni koaua ae Karawa. Inanon maiura i aonteaba ao ti anganaki inaomatara n rineia ba e nga te kawai ae ti na toua, te kawai ae rababa ae na kairira nako mone are nnen te tang ma te kangengewi ao te mate ae akea tokina ke Karawa are ti na kabaia iai inanon te mimitong ae akea tokina.
Ngkana ti tataro nakon Tamara ni kangai “Tamara are i Karawa’ ao ai aron ae ti iangoia ba te Atua E mena n te aonnaba teuana ae kaokoro ma te aonnaba ae ti mena iai. Te ota aio e tuangira ba e kaokoro te rabata ae ti maiu inanona ma tamneira. Ma n te tai are ti karina iaora Rabatan Iesu are E tikinaomata ao E maiu mani maeka ibuakora ao ngkanne ti na moanna n ata kakawakin kawakinan te maiu aio ba ti aonga n te taina ni kaitibo ma te Atua inanon te kabaia ao te mimitong ae akea tokina. Ti riai ngkanne n ataia ba bon ti teuana te aonnaba ao ti maiu inanona ba bon Abanuean te Atua ikai i aonteaba are na karokoira i Ierutarem ae bou ae boni karawa ngkana ti irira Iesu. Bon te kawai ae e ireiti are ti na toua mai iaonteaba ni karokoa tokin kawaira i Katawa.Ma aio e na ti reke ngkana ti rinea kawain Iesu ikai i aonteaba ae boni Ngaia te Tia Ununiki ae Raoiroi ao ti aki toua kawain te riaboro are e na kairira nakon te mate ae akea tokina i mone.