Wiki 17 Kanimabong
Warekan te Boki ae Nakoaia tibun Rewi. 23: 1, 4-11, 15-16, 27, 34-37.
E taetae te Uea nakoni Mote ni kangai: Aikai bongin ana toa te Uea, ma botaki aika tabu aika kam na weteia iai natini Iteraera n te tai ae motikaki.
N te bong ae te kateibui ma aua n te moa n namakaina, ao ngkana e a bon tairiki, ao bon ana Riao te Uea; ao n te bong ae te kateibui ma nimaua n te namakaina naba anne, bon toani bwerena aika aki karikaki, i bukin te Uea. Kam na kangi bwerena aika aki karikaki i nanoni itibong. Ni moani bongina, ao kam na karaoa te botaki ae tabu; kam na aki karaoa te makuri ae rawawata. Kam na kareana te amarake nakon te Uea i nanoni itibong. N te kaitibong, ao kam na aki karaoa te makuri ae rawawta.
E taetae te Uea nakoni Mote, ao E taku: “Taetae nakoia natini Iteraera, ni kangai nakoia: ‘Ngkana kam a roko n te aba ae I kaburea nakoimi, ao ngkana kam taia te uita iai, ao kam na uota te moa ni babati ni uita ae taiaki nakon te berebitero. E na kareanna i matan te Uea n ai aron te angakarea, ba kam aonga ni mutiakinaki. E na karaoa te angakarea anne te berebitero n te bong are i muin te tabati.
Man te bong are i muin te tabati, are kam uota iai te babati ni uita ba e na kareanaki, ao kam na wareka itiua te wiki aika banin. Kam na wareki nimabui te bong ni karokoa te bong are i muin te kaitiua n tabati, ao kam na manga anga karea nakon te Uea. Ma, n te bong are te katebuina n te kaitiua n namakaina, bon te bong ni kabarai muini bure. Kam na karaoa te botaki ae tabu. Kam na aki mamatam, ao kam na kareana te amarake nakon te Uea.
N te bong are te kateibui ma nimaua n te kaitua n namakain naba anne, ao e na karaoaki te toa ae toan uma n rianna i bukin te Uea, i nanoni itibong. Ni moanibongina, ae bongin te botaki ae tabu, ao kam na aki karoa te makuri ae rawawata. Kam na kareana te amarake nakon te Uea i nanoni itibong. N te bong ae te kawanua, ao kam na karaoa te botaki ae tabu ao kam na kareana te amarake nakon te Uea. Bon te bong ni botaki; kam na aki karaoa te makuri ae rawawata.
Akanne ana bongi n toa te Uea aika kam na weteia iai natini Iteraera, ma bongi ni botaki aika tabu i bukin te angakarea nakon te Uea, ao karea aika amarake, karea ni kabuokaki, angabai, ao karea aika tiringaki ma karea aika ninima, n ai aroni baireaaia ma bongia.”
Te Taramo 80: 3-6, 10-11
Kaekana: Anenea te Atua ae te tia buokira.
Tabeka te anene, orea te turam, Katanga te abi ae kamaiu ma te raea;
Katanga te bu n te oti n namakaina, ma te rin n namakaina, ba bongin ara toa. K.
Bon te tua i bukin Iteraera, Ao ana moti Atuani Iakoba.
Bon te baire nakoni Ioteba, Ngke E na ko ni buakana Aikubita. K.
E na akea atuam riki temanna, tai taromauria atua ianena.
Boni Ngai te Uea ae Atuam, Are I kairiko mai Aikubita. K.
Alleluia, alleluia.
Boni Ngai te kawai, te koaua ao te maiu: Akea ae nakon te Tama n aki rirou. Alleluia.
Euangkerio
Warekan ana Euangkerio Mataio.13: 54-58
E roko Iesu i abana, ao E reireinia aomata n aia tinakona. A mimi, ao a taku: "Ai mai ia wanawanana ma ana kakai? Ba tiaki natin te kabenta Teuanne? Ao tiaki bon tinana ae atongaki ba Maria? Ao tarina Iakobo, Ioteba, Timon ao Iuta? Ao manena, tiaki a bane ni mena i buakora? Ao ai mai ia arona akanne ni kabane?” Kanga a mama n taekana. Ma E taku Iesu nakoia: “Akea te tabo ae e na kakeweaki iai te burabeti ba ti i abana ao n ana auti.” Ao E aki kabatiai ana kakai n te aba arei, i bukin rawaia ni kakouaa.
Tibatiba: Ngkana kam ongo banana ao tai kamatoai nanomi