Wiki 18 Moanibong
Warekan te Boki ae Warekaia Iteraera. 11: 4-15
A tang natini Iteraera ni kangai: “Antai ae na anganira karara te iriko? Ti uringnga ba ti kang iriko i Aikubita n aki kaboa, ma kiukamba, meron, riiki, anian ma kaariki. Ao ngkai, ti a ainako, ba ti a kainnano ni bai ni kabane; akea te bai ae ti noria ba ti te manna aei!”
Te manna arei, ai aroni uan te korianta, ao tarana ai aron te teriam. A mae nako te koraki ba a na rikoia, ao a tia n te atibu ni ii, ke a ikia n te ikuiku, ao ngkanne e a kamaki i nanon baata, ao e karaoaki ba taiani keke. Ti tebo kanakina ma te keke ae karaoaki ma te ba. Ngkana e ruo te aoi ni bong i aon te maeka n rianna, ao e baka naba te manna ma ngaia.
E ongo tangia te koraki Mote, ba a tei utu nako ni mataroan umaia. E bati n urarake iai unin te Uea. Moan te rawawata nanoni Mote iai, ao e taetae nakon te Uea ni kangai:
“E aera ngkai ko karawawata am toro? E aera ngkai e aki reke akoau i matam, ba ko katoka rawawatan te botanaomata aei i aou? Tao I karika te botanaomata aei i aou? Tao boni ngai are I bungia, ba ko na kangai nakoiu: “Uotiia i aoni babam n ai aron te tia toba ae kamamma natina, ao uotiia nakon te aba ae I a tia n angania aia bakatibu n te taetae n tuea?’ N na karekea ia te iriko i bukin te botanaomata aei n ti ngai; bon te rawawata ae riaoni korakorau. Ngkana ai arom anne nakoiu, ao e raoiroi riki ba ko na kamateai. E bia reke akoau i matam, ba N na aki manga nora rawawatau.”
Te Taramo 80: 12-17
Kaekana: Neboa te Atua ae te tia buokira.
E aki ongo banau au botanaomata, e aki ira nanou Iteraera.
I katikuia ma matoatoan nanoia, ao a tou muin oin aia iango. K.
E bia ongo au botanaomata, e bia toua au kawai Iteraera!
ao N na kai kabakaia aiaia, ao N na oroia tan ribaia. K.
A na bobaraki aian te Uea i matana, ao a na makua n aki toki.
N na kaamarakeia Iteraera ni burawan te uita, N na kanuaia ni merin te ba. K.
Alleluia, alleluia.
I araningkami ba raou, ba I kaongoingkami ana taeka ni kabane Te Tama nakoiu. Alleluia.
Euangkerio
Warekan ana Euangkerio Mataio. 14: 13-21.
E mananga Iesu n te boti ba E na kararoaa n te tabo ae rereua. Ngke a nora anne te koraki ao a kitan aia kawa, ao a rianna n rimoana. Ngke E aerake, ao E nora te koraki ae bati, ao E nanoangaia; ao E kamaiuia aoraki. Ngke e a tairiki, ao a kawara Iesu reirei, ao a kangai nakoina: “Bon te rereua te tabo aei, ao e a bakanako te tai; ma kanakoia te koraki ba a na nako ni kaboi kanaia i nanoni kawa.” Ma E taku Iesu nakoia: “A aki bae n nako; kaamarakeia, ngkami.” Ao a taku: “Ti nimaua ara bwerena ao uoman ara ika.” E taku Iesu nakoia: “Uoti mai Ao E tuangia ba a na katekatekaia te koraki i aon te uteute, ao E anai bwerena ake nimaua ma ika ake uoman; ao E tararake nako karawa, ao E atonga te katituaraoi; ao E otoi bwerena n angania reirei ba a na angania aomata. A bane ni ngae n amarake, ao a rikoaki makorokoro ake nikirana ba tengauni ma uakora te baene. Ao tan amarake, bon nimanga, n aki warekaki aine ma ataei.
Tibatiba: Te Tia Kawakinai te Uea; bon akea kainnanou