Wiki 18 Kauabong
Warekan te Boki ae Warekaia Iteraera. 12: 1-3
A taetae Miriam ao Aaron ni kabuakaka Mote I bukin te aine ni Kuti are buna, ba e karekea buna ae aineni kuti. A kangai: “Tao E taetae te Uea nakoni Mote n ti ngaia? Tiaki E taetae naba nakoira?” E ongo te Uea. Ao moan te nanorinano Mote, Boni moan te nanorinano i buakoia aomata i aon te aba.
E rina n taetae te Uea nakoni Mote ma Aaron ao Miriam, ao E kangai: “Nakomai, ngkami teniman, nakon te Uma ni Botaki.” Ao a nako, ngaia te niman, ao E ruo te Uea i nanon te boua ae te nang, ao E tei ni mataroan te Uma. E wetea Aaron ma Miriam, ao a roko ngaia uoman. E taku te Uea: “Ongora n au taeka:
Ngkana iai te burabeti i buakomi, ao I kaotai nakoina ni kaitara,
ao I taetae nakoina n te mi.
Tiaki arou anne nakoni Mote ae au tabonibai, ba e memena I nanon umau,
I taetae nakoina ni kaitaraa, N te aro ae ota ao tiaki n te kaikonaki,
ba e nora aron te Uea.
E aera ngke kam aki maku ni kabuakaka au tabonibai ae Mote?” E urarake n un te Uea nakoia, E nako, ao e kitana te Uma te nang. Ao akea ba e a rebera Miriam, ao e mainaina n ai aron te tinoo. E rairaki Aaron n taraia, ao e noria ba e a rebera. E taku Aaron nakoni Mote: “Buokai, au uea, tai karekei kaira i bukin te bure ae ti karaoia i bukin te nanobaba, ae ti boni bure iai. I a butiko, ke e tai riki neiei n ai aron te ataei ae mate, ae e kanaki iterani irikona ngkana e otinako mai nanoni biroton tinana.” E butia te Uea Mote ni kangai: “Te Atua, Ko bia kamaiua, ba I a butiko.”
Te Taramo 50: 3-7, 12-13
Kaekana: Nanoangaira, te Uea, ba ti bure.
Te Atua, nanoangai n am akoi, Kabarai au bure ba ko nanoanga.
Tebokai mani buakakau, Kaitiakai man au bure. K.
I bon ata au bure, E aki mauna bureu mai matau.
I bure nakoim n ti Ngkoe, I karaoa ae buakaka i matam. K
Atuau, karika nanou ae itiaki, Karina irou te iango ae matoa,
Tai kararoaai ma matam, Tai ana mairou tamneim ae raoiroi. K.
Alleluia, alleluia.
Am taeka, te Uea, bon te koaua; Katabuira i nanon te koaua. Alleluia.
Euangkerio.
Warekan ana Euangkerio Mataio. 14: 22-36
E tuangia ana reirei Iesu ba a na toka n te boti ao a na rimoana n riaon te nama, ao Ngaia E kanakoia te koraki. Ngke E tia ni kanakoia, ao E ararakea te maunga n tataro n ti Ngaia. Ngke e a tairiki, ao akea raona. Ao e roko te boti i nukan te nama, ao e reimaurua, ba e tutuki te ang. Ngke e a kaan te karangaina, ao E kawariia Iesu n nakonako i aon te nama. Ngke e noria n nakonako i aon te nama, ao e nako nanoia, ao a taku: “Te anti!” Ao a maku ma n takarua. Ma E taetae Iesu nakoia ni kangai: “Karau nanomi, boni Ngai, tai maku.” E kangai Betero nakoina: “Te Uea, ngkana boni Ngkoe, ao tua ba N na nakoim i aon te ran.” E taku Iesu: “Nakomai.” Ao e ruo Betero man te boti, ao e nakonako i aon te ran ni kawara Iesu. Ma ngke e nora korakoran te ang, ao e maku, ao e nangi inako, ao e wewete ni kangai: “Te Uea, kamaiuai!” E arora baina Iesu n taua, ao E kangai: “Te aomata ae e uarereke am onimaki! e aera ngke ko nanououa?” Ngke a toka n te boti, ao e baka te ang. A bobaraki kain te boti, ao e kangai: “Te koaua, Natin te Atua Ngkoe!” Ngke a tia n riaon te nama, ao a koro i Kenetareta. Ao kain te tabo arei, ngke a kina, ao a karokoa taekana n te tabo arei ni kabuta, ao a uotaki aoraki ni bane nakoina; ao E butiaki ba E na katauia n ringa buruburun rabunana; ao a bane ni kamaiuaki ake a ringnga.
Tibatiba: Tua ba Nna nakonako iaon tari nakoim Iesu
N te bong aio ao ti kauringaki n te maon wareboki ba ti na riai n aki winanti ken i kabuakakaia ana aomata te Atua. Are nanona ba e na riai n aki kona bua onimakinaia aomat ake E rineia te Atua ba tan tia beku ibukina. Ti kauringaki naba ikai ba e irantangaia ana aomata te Atua. N te ewangkerio ao ti ongora aron Betro n tunga Iesu ba E na kataua ba e nankonako iaon tari nakon Iesu. Ngkana a matoa ara taratara iaon Iesu n onimakinna ao a bon akea te kanganaga ae to reke iai ao ti karoi bai nako n ana buoka Iesu ae te Atua, ae maka mani mimitong.
Inanon maiura aio ao tu karaoi baika a kamimi ma n tabetai ao ti nanououa ao ti taku ba iai tokin te bai aer kona ni karaoia te Atua. Betero bon akea ana kanganaga ngke E tuanga Iesu ba e na nakonako iaon tari. Ma ngke nakonako ao e moanna ni maku n taran buakan tari ao e bua ana onimaki iroun Iesu. N te tai are e nanouaoua iai ao e a ti iinako naba ao e taku ba e nangi bwabwa ao ni mate. Ao tera ae kona ni kanankoi arar taratra mairoun Iesu? Ngakana ti nanouau ao to kaitua ken i bure ao ngkanne ti na korouaki ma te Atua ao ti na namakina te maku ibukina ba ti aki toma ma ana kakawakin ao makan te Atua. E bon riai iroura ba ti na kamatoai ara taratara iaon Iesu ba ti aonga n aki rotaki n taian kabuanibai. Ti na butia te Atua ba e na katanira ba e na kona n reke nakoira te tai ae na bua ana taratara iaon Iesu ba m uina ao tin a mate. Uringa n tai ba ma ao iroun Iesu ao tin a kona ni karaoi bai nako.