Wiki 18 Kaabong
Warekan te Boki ae Warekaia Iteraera. 20: 1-13
A roko natini Iteraera ma aia koraki ni bane n rereuan Tin, n te moa n namakaina. A taku te koraki I Kateti. Boni ngaia te tabo are e mate ma n taunaki iai Miriam.
Akea nimaia aomata, ao a botaki n ekanako Mote ma Aaron. A kauntaeka te koraki nakoni Mote ni kangai: “Ti bia kamani mate n ai aroia tarira ake a mate i matan te Uea! E aera ngke ko kaira nako ana botanaomata te Uea nakon te rereua aei ba ti na mate iai ma ara man? E aera ngke ko kaotinakoira mai Aikubita ma ni kairira nakon te tabo ae buakaka aei? Bon te tabo ae aki tau i bukin te ununiki, ao akea iai te biku ma te kainikurebe ma te bamkuranete, ao akea naba iai te ninima te ran!”
A kitania aomata Mote ma Aaron, ao a nakon te Uma ni Botaki. A baka ni bobaraki i aontano, ao e kaoti mimitongin te Uea nakoia. E taetae te Uea nakoni Mote ni kangai: “Ana te manga ni kai, ao botiia aomata, ngkoe ma tarim ae Aaron. Ngkanne kam na tuatua, i mataia, nakon te ba aei ba e na anga te ran. Ko na katiia te ran i bukia man te ba aei, ao ko na kamooia aomata ma aia man.” E ana te manga Mote mai matan te Uea, n ai aron are E a tia n tuangnga. A botiia aomata Mote ma Aaron i matan te ba, ao e kangai nakoia: “Ongora, ngkami tan rawa. Ti na katiia te ran i bukimi man te ba aei?” E tabeka baina Mote, ao e orea te ba n te manga uatai, ao e tinako te ran ae bati, ao a moi te koraki ma aia man.
Ao E taku te Uea nakoni Mote ma Aaron: “Ngkai kam aki kakaonimaki ni kaota katabuakiu (kakoakiu) i mataia natini Iteraera, ao kam na aki karokoa te botanaomata aei n te aba are I angania.”
Boni ngaia ranini Meriba, are a kauntaeka iai natini Iteraera nakon te Uea, ao E kaota iai arona n tabu.
Te Taramo 94: 1-2, 6-9
Kaekana: Ngkana kam onga banana, ao tai kamatoai nanomi.
Nakomai, tina kukurei nakon te Uea, Ti na neboa ara Ba ni kamaiu.
Ti na roko i matana ma te katituaraoi, Ti na taromauria ni kuna ma anene. K.
Rin, bobaraki, katorobubua. Ti na taromauria te Uea are karikira.
Bon Atuara Ngaia, Ao ngaira ana botanaomata ae E kawakinna, Ma ana nanai ae E kairia ni baina. K
Kam bia ira nanoni banana n te bong aei: “Tai kamatoai nanomi n ai arona n te rereua
n tain te rawawata ma te kataki, ngke a kataai ma ni kaunai ami bakatibu, ao a bon tia n nora au makuri.” K.
Alleluia, alleluia.
E raoiakina aonaba te Atua i nanoni Kristo; ao E anganira taekan te raoi. Alleluia.
Euangkerio
Warekan ana Euangkerio Mataio. 16: 13-23.
E roko Iesu n te aba ae Kaitareia Biribi, ao E titirakinia ana reirei ni kangai: “A taku aomata ba antai Natin te aomata?” Ao a kaeka ni kangai: “A taku temangina ba Ioane te tia Babetito, ao temangina ba Eria, ao a taku tabeman ba Ieremia ke temanna mai buakoia burabeti.” E taku Iesu nakoia: “Ao ngkami, kam taku ba antai Ngai?” E taetae Timoni Betero, ao e kangai: “Bon te Kristo Ngkoe, ae Natin te Atua ae maiu.” E kaeka Iesu ni kangai nakoina: “Ko a kabaia, Timon ae natini Iona, ba e aki kaota anne nakoim te iriko ma te rara, ma bon Tamau are i karawa. Ao Ngai I taku nakoim, ba Betero ngkoe, ao i aon te ba anne N na katea au Ekaretia; ao a na aki tokanikai i aona mataroani mone. Ao N na anganiko kingin te Abanuea ae karawa; ane ko na kabaea i aon te aba, ao e na bae naba i karawa; ane ko na kabara i aon te aba, ao e na bara naba i karawa.” Ngkanne E kamatoa ana taeka nakoia ana reirei ba a na aki kaongoa temanna ba te Kristo Ngaia. Ngkanne E moa ni kaotia Iesu nakoia ana reirei ba E riai n nako Ierutarem, ba E na bati ni maraki iai irouia unimane ao mataniwia berebitero ma tani koroboki, ao E na kamateaki ao E na maungauti i muin tenibong. Ngkanne e katikia Betero, ao e boaia ni kangai: “Te Uea, ke E kawakiniko te Atua mai iai! E na tai karaoaki anne nakoim!” Ma E rairaki Iesu, ao E taku nakoni Betero: “Nako akuu, Tatan! Ko kauntabaai, ba am iango tiaki ana iango te Atua, ma bon aia iango aomata!”
Tibatiba: Ti na kakoaua Iesu ba natin te Atua ae Maiu
Tariu ao maneu inanon tai aikai ao iai te koraki ake a bon rawa ni kakoaua Iesu ba te Atua. A taku n aia oango ba a kakannato riki nakoin te Atua ae boni Ngaia ae te Tia Karikibai ae E mwaka mani mimitong ao akea tokin Ueana. Ibukin aio ao a bon rawa n ongotaeka iroun te Atua ba a taku ba akea bonganan karaoan Nanon te Uea. Ti noria ni karakinan otinakoia Iteraera mai Aikubita ba te koraki ake a rawa n ongo iroun te Atua ba a bon mate iaon kawaia imain ae a roko i Kanaan.
Tariu ao maneu tera te bai ae kananokawaki irouia aomata aika aki kakoaua Iesu ao a rawa n ongotaeka Irouna? Te kananokawaki irouia te koraki aikai ba a karaoa te bure ae moan te kamamate ba te bure ni kamoamoa. Bon aio raoi aia bure ara moan karo ba a kan riki ba Atua ngaia. Are nanona ba a taku n aia iango ba a wanawana ao a kakannato riki nakon te Atua. A rawa ni tauraoi ni butimaea te koaua are ngaiia bon ana karikibai te Atua ao e bon tara ni kamanga ae tan karikakaki a managa taku ba a kakannnato riki Teuare E karikia ke te tia Karikibai.
Tariu ao maneu ti riai ni bububti ana nanoanga te Atua ba ti na aki kabuakakaki n te bure ni kamoamoa ba muina ti mate n aki totoki. Ti na butia te Atua ana karatia ao ana nanoanga ba ti na kakoaua Iesu ba boni Ngaia Natin te Atua ae maiu. Ti bia kairaki n te koaoua aio ba ti aonga ni maiuakina ana tangira Iesu ao ni karekea te maiu ae akea tokina i Karawa.