Wiki 19 Moanibong
Warekan te Boki ae te Tua Kaua. 10: 12 – 22
E kangai Mote nakon te koraki: “Ao ngkai, Iteraera, tera ae E tangiria te Uea mairoumi? Bon aei. Ko na maka te Uea ae Atuam, ko na tou muin ana tua, ko na tangiria, ko na toro iroun te Uea ae Atuam ma nanom ni kabane ao tamneim ni kabanea, ko na kawakin ana tua te Uea ma ana moti ni kabane aika I tuangko n te bong aei, ba ko aonga ni kabaia.
Bon ana bai te Uea ae Atuam karawa ao karaoani karawa, aonaba ma kanoana nako. Ma E nanoniia ami bakatibu te Uea, ba E tangiriia, ao i muia E rineia aia kariki, aika boni ngkami, mai buakoia botanaomata nako ni karokoa te bong aei. Korotobibi nanomi, ao tai manga kamatoai nanomi ba te Uea ae Atuami, bon Atuaia atua ao aia Uea uea, bon te Atua ae kakanato ae tokanikai ma ni kakamaku, ae aki nanonano ao E aki mamanaki n taiani karea. E kaeta taekan ane e mate ana karo ma neiere e mate buna, ao E tangira te irua n anganna kanana ma rabunana. Kam na tangira te irua, ba boni irua naba ngkami ngkoa n te aba ae Aikubita. Ko na maka te Uea ae Atuam, ko na toro irouna ao ko na nimitia, ao ko na taetae n tuea n arana. Ko na neboia ba bon Atuam. E karaoi i bukim baika kakanato ma ni kakamaku, aika ko a tia n nori ni matam. Ti itingaun am bakatibu ngke a ruo ngkoa nako Aikubita, ma E a tia ni karikirakeko te Uea ae Atuam, ao ko a maiti ngkai n ai aroni itoini karawa.”
Te Taramo 147: 12-15, 19-20
Kaekana: Ierutarem, neboa te Uea.
Ierutarem, neboa te Uea, Tion, neboa Atuam.
E kamatoai kaini mataroam, E kakabaiaia natim akana i nanom. K.
E kawakina te raoi i aon tiam, E kanuaiko ni burawan te uita.
E Kanakoa ana taeka nako aon te aba, E buti maka ana rongorongo i aona. K.
E kaota ana taeka nakoni Iakoba, Ao ana tua ma ana moti nakoni Iteraera.
E aki karaoa anne nakon te aba riki teuana: Akea ae ata ana makuri. K.
Allelluia, alleluia
Katituraoa te Atua ae Tamara iroun ara Uea ae Iesu Kristo, ae ke e maiu i nanomi ana taeka ae banin raoi. Alleluia.
Euangkerio
Warekan ana Euangkerio Mataio. 17: 22-27
N te bongina ngke a botaki i Kariraia, ao E kangai Iesu nakoia ana reirei: “E na kabureaki Natin te aomata i nanoni baia aomata, ao a na kamatea, ao E na mangauti i muin tenibong.” Ao a bati n rawawata iai. Ngke a roko i Kaberanaum, ao e kawara Betero te tia rikoa te angabai ae te itera n tiekera, ao e taku nakoina “E anga te itera n tiekera am Tia Reirei ke e aki?” E taku Betero: “E anga.” Ngke E roko n te auti, ao E rimoa ni kangai Iesu nakoina: “Tera am iango, Timon, a karekea te angabai mai ia uean aon te aba? Mairouia nati ke mairouia ianena?” E kaeka Betero ni kangai: “Ianena.” E taku Iesu nakoina: “Ma ngaia ae a aki bae iai nati. Ma a kawa ni irarang iai; ma ngaia ae nakon te nama, tewenako te matau, ana te ika ae moa n teke iai, ao kaurea wina: ko na kunea iai teuana te tiekera; ko na anaia n angania, i bukiu ao i bukim.”
Tibatiba E tauaninne ana tangira te Atua ibukira