Wiki 19 Katenibong
Warekan te Boki ae te Tua Kaaua.34: 1-12
E mananga Mote man abani Moaba, ao e ararakea te maunga ae Nebo, I taberani Bitika, ni kaitara Ieriko, ao E kaota te aba arei ni kabanea te Uea nakoina, ba Kirea i Maeao; ao Nekebo ma te aba are Maruani Ieriko ae te kawa ni baam, ni karokoa Toa. E taku te Uea nakoina: “Anne te aba are I a tia ni kaburea nakon Aberaam, Itaaka ma Iakoba ni kangai: ‘N na angania am kariki.’ I a tia ni kaotia nakoimi ba ko na nori ani matam, ma ko na aki roko iai.” E mate n te tabo arei Mote ae ana toro te Uea, i abani Moaba, ni kaitara Betabeora. Akea temanna ae ata ruana ni karokoa ngkai. Tebubua uabi ana ririki Mote ngke e mate, ao e aki ro matana, ao e aki bua korakorana. A tanginiweneia Mote natin Nun, ba e a tia ni katokai baina Mote i aona. Ao a antaeka irouna natini Iteraera, n ai aron ana taeka te Uea nakoni Mote.
I muin anne, ao e aki manga teirake i buakoia Iteraera te burabeti temanna ae ai aroni Mote, are nora te Atua ni kaitara. Ai bati ra kanikina ma kakai ake e karaoi iroun te Uea n te aba ae Aikubita, nakoni Barao ao nakoia ana aomata ni kabaneia, ao nakon abana ni kabanea! Ai korakora ra baina, ao ai kakamaku ra Mote n ana makuri i mataia Iteraera ni kabaneia!
Te Taramo 65: 1-3, 5, 8, 16-17
Kaekana: E mimitonga te Uea i etani karawa.
Neboa te Atua, aonaba ni bane, anenea neboan arana,
kamoamoa mimitongina. Kangai nakon te Atua: “Ai kakanato ra ami makuri!” K.
Nakomai, nori ana makuri te Atua, a kakamaku ana makuri i bukia aomata.
Botanaomata, karaoiroa Atuara, katangi banami n neboia. K.
Bane mai, ngkami aika kam maka te Atua, N na kaongorai ngkami ana makuri i bukiu;
I weteia ni wiu, I neboia n neweu. K.
Alleluia, alleluia.
E weteira te Atua n te Euangkerio, ba ana botanaomata are E karekea ara Uea ae Iesu Kristo. Alleluia.
Euangkerio
Warekan ana Euangkerio Mataio. 18: 15-20
E kangai Iesu nakoia ana reirei: “Ngkana e bure tarim nakoim ao ko na kawaria n tuangnga, n ti ngkoe ma ngaia. Ngkana e ongo, ao e reke tarim iroum. Ma ngkana e aki ongo, ao kaira raom temanna ke uoman, ba aonga ni baireaki bai ni kabane n aia taeka tani kakoaua aika uoman ke teniman. Ma ngkana e rawa n ongo irouia, ao kaongoa te botaki. Ngkana e rawa n ongo iroun te botaki, ao ko na aranna ba te bekan ao te bubirikano. I bon tuangi ngkami te koaua: ane kam kabaea i aon te aba, ao e na bae naba i karawa; ao ane kam kabara i aon te ba, ao e na bara naba i karawa. I tuangi ngkami naba, ba ngkana a botaki uoman iroumi ni bubuti te bai teuana, ao a na anganaki iroun Tamau are i karawa. Ba ngkana a botaki uoman ke teniman n arau, ao I mena i buakoia.”
Tibatiba: Ai akoira te Atua, akea tokin Ana tangira
Tariu ao maneu e bon riai inanon maiura ni kekeiaki iaon te aba aio ba ti aki toki n ni kakaraba te Uea ibukin kororaoin ana tangira nakoira n tai nako. Ti na tauraoi n nora ana makuri n tangira te Uea nakoira ao ti riai n aki toki ni karabaraba ba akea tokin ana tangira te Atua. Ngkana ti tarai muin bai aika tia n riki inanon maiura aio ti na bon nora makan bain te Atua ae a tia ni kawakinira ao ni kairira ba ti aonga n roko ni nnera ao inanon maiura ae ti mena inanora n tokin ana te tai aio. Ao ngkana ti tan rikaki ao ti na bon kakoaua ana akoi ao ana tangira te Uea ae akea tiana ma tokina.
Inanon ara borau ni mananga nakon te tabo ae ti na nako iai ao ti ataia ba boni iai ae raonira ao e kairira ao e kawakinira ba ti na bane n roko n tokin kawaira n aron ana kantaninga te Atua. Inanon mangaia te nati n Iteraera inanon te rereua nako Kanaan ao E rinea Mote ba te tia kairia. E angan Mote te kona n taetae ni kaitara ma ngaia ba e na tauraoi te ibuobuoki nakoia Iteraera. N te tai aio ngkai ti tabe ni borau ao e manga mauikoa Natina ae te Rikitemanna ae Iesi ae boni Ngaia te Atua ao ae maiu ibuakora n tai nako n te Eukaru ba E na kairira ao E na raonira ao ni kawakinira inanon ara borau nakoni mwengara are e a tia n ni katauraoia ibukira n tatabemanira. Ti noria ngkanne ikai ba E teimatoa ana akoi te Uea ao akea tokin ana tangira.