Wiki 19 Kanimabong
Warekan te Boki ae taekani Iotua. 24: 1-13
E botiia barongani Iteraera ni bane Iotua i Tekem, ao e weteia unimane, mataniwi, tani moi ao tani koroboki; ao a roko i matan te Atua. Ao e kangai Iotua nakoia aomata ni kabaneia:
“E kangai te Uea ae Atuaia Iteraera: ‘A maeka ngkoa ni itera te karanga are te iterana ami bakatibu, n ai aron Tera are tamaia Aberaam ma Naora, ao a toro irouia atua tabeman. Ao I ana tamami are Aberaam mai mainukun te karanga, ao I kairia, ao I anganna Itaaka. Ao I angani Itaaka Iakoba ma Etau. I angan Etau te maunga ae Teira ba abana. A ruo Iakoba ma natina nako Aikubita. I muina I kanakoa Mote ma Aaron, ao I orea Aikubita n taiani kakai ake I karaoi i aona. Ngkanne I kaotinakoi ngkami ma iai. I kaotinakoia ami bakatibu mai Aikubita, ao kam roko i rarikini marawa, ao a rimuia tamami I Aikubita ma taiani ka ao tan tokaria aoti, ni karokoa marawa ae Uraura. Ao a wetea te Uea, ao E takina te mabubu ae matenten ae te i marenami ma I Aikubita, ao E kaoka tari nako aoia ba e na rabunia. Baike I karaoi i Aikubita, ao kam nori ni matami. Ao kam maan ni maeka i nanon te rereua. I kariningkami i abaia Amoraite ake I kabureia i nanoni baimi, ba kam na abana abaia, ao I kamaunaia i maimi. Ngkanne e teirake Baraka are natin Tibore ae ueani Moaba ni buakania Iteraera, ao e kanakoa weteani Baraam ba e na karereanti ngkami. Ma I aki kan ongo irouni Baraam are natini Beora; ao I katekeraoi ngkami, ao I kamaiungkami mai nanoni baina.
I muina, kam ri nanoni Ioretan, ao kam roko i Ieriko, ma a buakani ngkami matawanin Ieriko ao Amoraite, Beritaite, i Kanaan, tibun Eta, Kirekataite, Iwaite ao i Iebuti; ao I kabaneia ni kabureia i nanoni baimi. I kanakoia maniberu n rimoami, ao a kaikoia aia uea Amoraite i maimi. E karaoaki anne, tiaki n am kabang ke am kai ni katebe. I angani ngkami te aba ae kam aki makuri iai. I angani ngkami naba kainikurebe ma oriwa aika kam aki uniki, ba kam na amarake mai iai.”
Te Taramo 135: 1-3, 16-18, 21-22
Kaekana: Akea tokin ana tangira.
Alleluia. Katituaraoa te Uea,
ba E akoi, Ao akea tokin ana tangira. K.
Katituraoa Atuaia atua, Ba akea tokin ana tangira.
Katituaraoa aia Uea uea, Ba akea tokin ana tangira. K.
E kairia ana botanaomata ri nanon te rereua, Ba akea tokin ana tangira.
E oroia uea ake a maka, Ba akea tokin ana tangira. K.
Ba akea tokin ana tangira. E anga abaia nakoia Iteraera,
Ba akea tokin ana tangira. K.
E angan ana toro ae Iteraera, Ba akea tokin ana tangira.
E kamaiuira mairouia tani bainikirinira, Ba akea tokin ana tangira. K.
Alleluia, alleluia.
E maiu ao e maka ana taeka te Atua, E nina nakon te nano. Alleluia.
Euangkerio
Warekan ana Euangkerio Mataio. 19: 3-12
A kawara Iesu Baritaio, ba a kani kamanea, ao a kangai nakoina: “E katauaki te aomata ba e na kanakoa buna ngkana iai bukina?” E kaekaia ni kangai: “Kam aki wareka taekan te Tia Kariki bai ngke E moa ni karika te aomata, ba E karaoia ba te mane ao te aine, ao E kangai: ‘Ai ngaia ae e na kitana tamana ma tinana te aomata ba e na nim ma buna, ao a na riki ba ti te irikona ngaia uoman.’ Ma ngaia ae tiaki uoman ngaia ba ti te irikona. Ai ngaia, ane e botia te Atua, ao ke tai karaurea te aomata.” Ao a taku nakoina: “E aera Mote ngkanne ngke e tua ba e na anganaki te aine te beba n raure ngkana e kanakoaki?” E kaekaia Iesu ni kangai: “E kariai ngkami Mote ni kanakoia bumi, i bukini matoatoan nanomi, ma tiaki arona mai moana. Ao I tuangi ngkami, ba ane kanakoa buna, ae tiaki buna ni kewe, ba e na buna temanna, ao e wenenibure iai; ao ane buna neiere kanakoaki, ao e wenenibure naba.” A taku ana reirei nakoina: “Ngkana ai ngaia anne aron te mane ma buna, ao e a tau te aki iein.” E kaekaia Iesu ni kangai: “Aki bane aomata n ongo nanon te taeka anne, ma a ongo ti akana anganaki te ongo. Ba iai iunaki aika bon aroia mangke a moa ni bungiaki, ao iai iunaki aika bon aroia n aia makuri aomata, ao iai iunaki aika bon aroia i bon irouia i bukin te Abanuea ae karawa. Ane kona n ongo, ao ke ongo.”
Tibatiba: Akea tokin ana tangira te Uea n tai nako