Wiki 20 Moanibong
Warekan te Boki ae Tani Motiki taeka. 2: 11-19
A karaoa ae buakaka natini Iteraera i matan te Uea, ao a toro irouia Baara. A kitana te Uea ae Atuaia aia bakatibu are kaotinakoia man te aba ae Aikubita, ao a iria atua tabeman ake atuaia botanaomata ake I rarikia. A bobaraki I mataia, ao a kauna te Uea; a kitana te Uea ba a na toro irouni Baara ma Atitoreta. Ao e urarake unin te Uea nakoia Iteraera. Ao E katikuia irouia tani kamarua ake a kuribaia; ao E kabureia nakoia aia kairiribai ake a otabaninia, ao a aki kona n tukiia. N tabo nako ike a roko iai, ao e roko bain te Uea n ekiia nako ni karawawataia, n ai aron ana taeka nakoia, ao n ai aron ana taeka n tuea te Uea nakoia. Ao e karawawataia iai n te aro ae korakora.
Ngkanne E kateia tani Motikitaeka te Uea i bukia, ao E kamaiuia Iteraera mairouia tani kuribaia. Ma a ki ongo naba irouia tani motikitaeka. A kitana te Uea ba a na toro irouia atua tabeman ma ni bobaraki i mataia. A waetata ni kitana te kawai are a toua aia bakatibu, ake a ira nanon ana tua te Uea; ao a aki kakairi irouia. Ngke E kateia aia Tia Motikitaeka te Uea, ao E mena te Uea iroun te Tia Motikitaeka ni kabanea ana tai ni maiu, ao E kamaiuia mairouia aia kairiribai; ba e rotaki nanon te Uea ngke a tang i an rawawataia irouia tani bainikirinia. Ma ngke e mate te Tia Motikitaeka, ao a manga baka naba, ao a buakaka riki nakoia tamaia. A iria atua tabeman, n toro irouia ma ni bobaraki i mataia, ao a aki kaki aia makuri ma aroaroia tamaia ake a bubuaka.
Te Taramo 105: 34-35, 39-40, 43-44
Kaekana: Uringira, te Uea, ba ko tangira am botanaomata.
A aki kamaunaia botanaomata, n ai aron ana taeka te Uea nakoia;
ma a botaki ma bekan, ma ni kakairi n aia katei.K.
A toro irouia antia, ba te bai ni kabakabaka nakoia,
A anga natia mane ma aine, Ba te karea nakoia taimonio. K.
A riki ni kamara n aia makuri, A bure n urua aia berita ma te Uea.
E maraki nanon te Uea iroun ana botanaomata, E korakora ribakina irouna. K.
A maiti ana tai ni kamaiuia, Ma a rawa, ba a buakaka.
Ao E nanoangaia naba n rawawataia, Ngke E ongo tangia.K
Alleluia, alleluia.
Butimaea ma te nanoraoi Te taeka ae unikaki I nanomi, Ba e kona ni kamaiu tamneimi. Alleluia.
Euangkerio
Warekan ana Euangkerio Mataio. 19: 16-22.
E nakoni Iesu temanna te aomata, ao e kangai nakoina: “Te Tia Reirei, tera te raoiroi ae N na karaoia ba e aonga n reke irou te maiu ae aki toki?” E taku Iesu nakoina: “Ko ti titirakinai taekan te raoiroi? Ti temanna ae raoiroi. Ma ngkana ko kan rin n te maiu, ao kawakin taian tua.” Ao e kangai teuarei: “Tua ra?” E taku Iesu: “Tai kamamate, tai wenebure, tai ira, tai kaotioti ni kewe, karinea tamam ma tinam, tangira raom n ai arom ngkai ko tangiriko.” Ao e kangai te rorobuaka nakoia: “I kawakini baikanne ni kabane: ao tera riki ae riai irou?” E taku Iesu nakoina: “Ngkana ko kan raoiroi n te aro ae kororaoi, ao nako, kaboi nako am bai, n angania akana kainnano, ao e na reke am kaubai i karawa; ao ko a nakomai ni irirai.” Ngke e ongo anne te rorobuaka, ao e nako ma te nanokawaki, ba e bati ni kaubai.
Tibatiba; Nako kaboi nako am bai ao angania, anganaia kainnano ao e na reke am kaubai i Karawa ao iriirai