Wiki 20 Kauabong
Warekan te Boki ae Tani Motikitaeka.. 6: 11-24
E roko ana anera te Uea n tekateka i an te kai ae te terebinte are I Obera, are ana bai Ioati ae tibun Abietera. E tabe natina ae Kiteon ni kiniki uita i nanon te kai n ongong kurebe, ba e na karaba nakoni Mirian. Ao e kaoti ana anera te Uea nakoina, ao e kangai nakoina: “E mena te Uea iroum, ngkoe te tia buaka ae ko ninikoria.” E taku Kiteon nakoina: “Au Uea, ngkana E mena te Uea iroura, ao e aera ngkai ti karawawataki? Ao a ngaa taiani kamimi aika a karakin tamara nakoira ni kangai: ‘E kawaerakeira te Uea mai Aikubita’? Ma e kitanira ngkai te Uea, ao E katikuira i ani makani Mirian.”
Ngkanne E rairaki Te Uea nakoina, ao E taku: “Nako ma korakoram anne, ao ko na kamaiuia Iteraera mairouni Mirian, ba ae I kanakoko Ngai.” E taku Kiteon nakoina: “Au Uea, N na kanga ni kamaiuia Iteraera? Bon te kabanea ni mangori au utu i buakoia tibuni Manate, ao bon te kabanea ngai n ana auti tamau.” E kangai te Uea nakoina: “N na raoniko, ao ko na kataea ana kai Mirian, n ai arona ngke ti temanna te aomata ngaia.” E taku Kiteon nakoina: “Ngkana ko kukurei irou, ao kaota am kanikina ba boni Ngkoe ae ko taetae nakoiu. I a butiko, tai kitana ikai ni karokoa I a manga okiriko; N na uota au karea ni kawenea i matam.” Ao E kaeka ni kangai: “N na tiku ni karokoa okim.”
E nako Kiteon ao e katauraoa temanna te koti te tei, ao e karaoi bwerena aika aki karikaki ma teuana te eba ni burawa. E nnea te iriko i nanon te baene, ao ranna i nanon te baata, ao e uoti nakoina i an te terebinte. Ngke roko, ao e taku ana anera te Uea nakoina: “Anaa te iriko ma te bwerena aika aki karikaki, ao kawenei i aon te ba aei, ao kabaroa ranna iai.” Ao e ira nanona Kiteon ba bon ana anera te Uea! I nora ana anera te Uea ni kaitara!” E taku te Uea nakoina: “Ke e mena te raoi iroum; tai maku: ko na aki mate.” Ao e katea te baonikarea Kiteon nakon te Uea n te tabo arei, ao e aranna ba “Te-Uea-te-raoi.”
Te Taramo 84: 9, 11-14
Kaekana: Ana taeka te Uea bon taekan te raoi.
N na kakauongo: tera ana taeka te Uea? Ana taeka bon taekan te raoi
Nakon ana botanaomata ao nakoia raona, aika rairi nanoia nakoina. K.
E botaki te tangira ma te koaua, E iraorao te eti ma te raoi.
E na kaoti te koaua man te tano, E na baraki te eti mai karawa. K
E na karekea kabaiara te Uea, E na anga uana abara;
E na rimoana te eti, E na rimuina te raoi. K.
Alleluia, alleluia.
E teimatoa n aki toki ana taeka te Uea; bon te Rongorongo ae Raoiroi ae kam anganaki.
Alleluia.
Euangkerio.
Warekan ana Euangkerio Mataio…19: 23-30
E kangai Iesu nakoia ana reirei: “I tuangingkami ae koaua: e na kanganga iroun te kaubai te rin n te Abanuea ae karawa. I boni manga tuangingkami: e bebete riki rinin te kamero ni bangabangan te neiran nakon rinin te kaubai n te Abanuea ae karawa.” Ngke a ongo anne reirei, ao a bati ni kuba, ao a taku: “Ai antai ae kona ni kamaiuaki?” E tarataraia Iesu, ao E taku nakoia: “A aki kona anne aomata, ma E konai bai ni kabane te Atua.”
E taetae ngkanne Betero, ao e taku nakoina:” “Noria, ti a tia ni katani bai ni kabane ao ti a iriko; tera tibangara iai?” E taku Iesu nakoia:” I tuangingkami ae koaua, ngkami aika kam irai: n tain te maiu ae bou, ngkana E tekateka Natin te aomata n ana kaintokanuea ae mimitong, ao kam na tekateka naba i aoni kaintokanuea aika tebui ma uoua, ni motiki taekaia barongani Iteraera aika tengauni ma uabaronga. Ao te aomata nako ae kitana ana auti, tarina, manena, tamana, tinana,natina ke abana, i bukin arau, ao e na anganaki boona ae tebubua te tai maitina, ao e na baina te maiu ae aki toki. A maiti tan rimoa aika na rimui, ao tan rimui aika na rimoa.”
Tibatiba: E bebete riki rinin te kamero ni bangabangan te neiran nakon rinin te kaubai n te Abanuea ae karawa
N te bong aio ao ti kauringaki iroun te Atua ba e teimatoa n tai nako ana tangira ma ana nanoanga te Atua ao E tauraoi n anganira ana raoi ma ana kakawakin ba ti aonga n roko n tokin kawaira are E a tia ni katauraoia ibukira. Eng, bon ana kantaninga te Atua ibukira n tai nako ba ti na karelea te raoi ma te rau mairouna ba ti aonga n teinatoa ni kunea te raoi ma te mwengaraoi ao a aonga ni koro bukin ara kantaninga n aron ana kantaninga te Atua i bukira.
Irarikin ana karaunamo te Atua n tuangira ba ti na karekea ana raoi ma ana kakawakin ao ti kauringaki n te ewangkerio n te bong aei ba ti na kona n rin n te Abanuea ae Karawa ngkana ti tauraoi ni kakea mairoura tangiran bain te maiu aio n aron te kaubai ma te kukurei n rabatara. Eng tariu ao maneu, ti na bon kona n rin n te Abanuea ae Karawa ngkana ti kaikoi baini karawa. E na kona n kai rin riki te kamero ni bangabangan te neiran nakon te kaubai ae aki kona n rin i Karawa.
Te rin i karawa bon ti aia bai akana aki katinebuaki ni kaubain te maiu aio ke te koraki ake a kona ni kabonakoi kaubaia ao n angania kainnano manena ao n tauraoi n tabeka aia kaibangaki ni katoa bong ao n irira Iesu.