Wiki 20 Kanimabong
Warekan te Boki ae taekan Nei Ruta. 1: 1, 3-6, 14-16, 22
N aia tai tani Motikitaeka, ao e roko te rongo i aon te aba; ao e mananga temanna te aomata mai Betereem i Iuta, ma buna ao natina ake uoman, ba a na nako ni maeka i abani Moaba. E mate Erimereka are bun Naomi, ao e tiku neierei ma natina mane ake uoman. A karekeia buia i buakoia aineni Moaba. Aran temanna Oreba, ao are temanna Ruta; ao a tiku n te tabo arei tao tebuina te ririki. Ao a mate naba ngaia ake Maron ao Kirion; ao e tiku Naomi n akea natina mane ao n akea buna. Ao e teirake, ngaia ma buia natina, ba e na kitana abani Moaba, ngke e ongo ba E a tia ni kawaria ana botanaomata te Uea ma n angania te amarake. E kaboria neiere Oreba ma tinani buna, ao e okira ana botanaomta; ma e tiku Ruta ba raon Naomi. E taku Naomi nakoina: “Noria, e a tia n oki tarim nakon ana botanaomata ao nakon atuana; oki naba Ngkoe, iria.” E taku Ruta nakoina: “tai tebonai ba N na kitaniko ma ni kararoaai ma ngkoe, ba ike ko na nako iai, ao N na maeka naba iai; am botanaomata bon au botanaomata; Atuam bon Atuau; ike ko mate iai, ao N na mate ma n taunaki naba iai, Ke E oreai te Uea n aei, ao n arei naba, ngkana tiaki te mate ae karaureira.” Ai ngaia are e a oki Naomi man te aba ae Moaba, ma raona Ruta ae bun natina, ae te I Moaba. A roko i Beterem ngke e moanaki taian te baare.
Taramo 145: 5-20
Kaekana: Tamneiu, neboa te Uea.
E Kabaia ane E buokia Atuani Iakoba, Ane onimakina te Uea ae Atuana,
Boni Ngaia ae karika karawa ma aonaba, ao marawa ma kanoaia nako. K
E kakaonimaki te Uea n aki toki, E eti nakoia akana karawawataki.
E kaamarakeia akana bakii, E kabaraia akana kabaeaki. K
E kaurei mataia mataki, E kaetiia akana baoua.
E kawakina te irua, E buoka ane e mate buna ke ana karo. K
E tangiriia akana raoiroi, ma E tuki kawaia akana buakaka.
E tautaeka te Uea n aki toki, Ae Atuan Tion n roro nako.K
Euangkerio
Warekan ana Euangkerio Mataio, 22: 34-40
E titirakina Iesu temanna i buakoia Baritaio ni kangai: “Tera te tua ae kakanato riki i buakon tua? E kaeka Iesu ni kangai: “Ko na tangira te Uea ae Atuam ma nanom ni kabanea, ma tamneim ni kabanea, ma am iango ni kabanea. Titebo naba kakanaton te kauoua n tua ae kangai: Ko na tangira raom n ai aron tangiram i bon iroum. E bane te Tua ma burabeti i nanon tua akana uoua anne.
Tibatiba: E aera ngkai ti na riai n neboa te Uea ma Tamneira?
Tariu ao maneu n te bong aio ao ti rinea te boto n iango aio ba kairan maiura inanon ara kekeiaki n irira Iesu.. E bon anaaki aio man kaekan te taramo n te bong aio ae kangai: “Tamneiu Neboa te Uea.” Ao e area ngkai ti na riai n neboa te Uea ma tamneira? N te moan wareboki ao ti ongora aron te aine ae Ruta n tauraoi n tiku irarikin tinan kainabana ae Naomi ae a tia ni mate. Ngke e tuanga Naomi ba e na iangoa okiran ana botanaoamata ao atuana ao e taetae n tuea Nei Ruta ba e na tiku irarikin Naomi ni karokoa matena ba e na buokia. Ao e aera ngkai e tauraoi Nei Ruta ni karaoa aio? Eng teuana bukina ae I noria ba Nei Ruta bon te aine ae onrake n te tangira.
N te ewangkerio ao ti ongora aron ana kaeka Iesu nakon te baritaio are titirakina Iesu ba tera te kabanea ni kaknnato n tua. E kaeka Iesu n tuangnga te baritaio ba ana Tua te Atua ake tebuina a kona ni bane ni botaki iaon tuan te tangira. Aio are kamatoa naba nakoira Iesu ba mauira aio e riai ni boto iaon maiuakinan te tangira. Ti na uringa ba te tangira bon mairoun te Atua ao ngkana ti tangira ao ti kaotia ba ti mananga ke ti bungiaki ao ti riki mairoun te Atua. Ao irarikin aio ao e kauringira Iesu ba ngkana ti tangira ao ti riai ni karaoia nakon te Atua moa ao imuina bon nakoia raora. Are nanona ngkanne ba ngkana ti tangira ao ti riai n tangira ma tamneira ngkai bon te Atua te Tamnei.ao ngkana ti tangira ma tamneira ao ngkanne ti bon kababaneira n tangira. Ngkana ti tangira n rabatara ao ti bon aki kona n tangira n ai aron are E a tia n tangira Iesu.