Wiki 21 Moanibong
Warekan ana moa Reta Bauro nakoia I Tetaronike ..1: 2-5, 8-10
Ti katituaraoa te Atua n tai nako i bukimi ngkana ti uringingkami n ami tataro. Ti aki toki n uring aromi i matan te Atua ae Tamara, ba uan ami onimaki, ami makuri n tangira ma nanomatoami ni kataninga iroun ara Uea ae Iesu Kristo.
Ti ataingkami, tari aika kam tangiraki iroun te Atua, ba kam rineaki irouna. Ba e roko ara Euangkerio iroumi, tiaki ti n te taeka ma bon raona te korakora ma ana makuri te Tamnei ae Raoiroi ao te nanomatoa n akea te nanououa. Kam bon atai arora ngke ti mena i buakomi, ngke ti buokingkami iai. Ti aki bae n taekin riki aromi: ti kaongoaki arora n roko iroumi ma aromi ngke kam rariraki nakon te Atua ma ni kaki bouananti ba kam na toro iroun te Atua ae maiu, ae koaua; ma aromi ngkai ni kantaninga Natina ae na nako mai karawa, ao are E a tia ni kautia te Atua mai buakoia mate, ae boni Iesu, are kamaiuira man te un ae na roko.
Te Taramo 149: 1-6, 9
Kaekana: E kukurei te Uea n ana botanaomata
Anenea te Uea n te kuna ae bou, neboia i bukoia ana aomata.
Ke e kabaia Iteraera iroun te tia karikia, ke a kimareirei natin Tion iroun aia Uea. K.
Ke a neboa arana n te ruoia, ke a Katanga te abi ma te turam i bukina.
Ba E tangira ana botanaomata te Uea, e katokanikaia akana mangori. K.
Ke a kakatonga ana aomata n te mimitong, ke a takarua ni kukurei ni motirawaia.
Ke aoni wia n neboan te Atua: Bon anne kakanatoia ana aomata. K.
Alleluia, alleluia.
Te Uea, reireiai kawaiu, Kairai n te kawai ae eti. Alleluia.
Euangkerio
Warekan ana Euangkerio Mataio. 23: 13-22
E taetae Iesu nakoia aomata ao nakoia ana reirei ni kangai: “Kam na maraia, ngkami tani koroboki ma Baritaio, aika tani kewea te aba ba kam kaina te Abanuea ae karawa nakoia aomata! Kam bon aki rin ngkami, ao kam tukiia akana kan rin! Kam na maraia, ngkami tani koroboki ma Baritaio aika tani kewea te aba! Kam kabuta marawa ma aonaba ba kam na raira nanon temanna te aomata, ao ngkana e a reke, ao kam karaoia ba kaini Kenna, ae uoua te tai buakakana riki nakoimi. Kam na maraia, ngkami tani kairiri aika kam mataki, aika kam kangai: ‘Ane taetae n tuea n te Temboro, ao akea baena; ma ane tuea ni kooran te Temboro, ao e bae iai.’ Te koraki ni baba ma ni mataki! Tera ae kakanato riki, te koora ke te Temboro ae katabua te koora? Kam kangai naba: ‘Ane tuea n te baonikarea, ao akea baena; ma ane tuea n te karea ane i aona, ao e bae iai.’ Te koraki ni mataki! Tera ae kakannato riki, te karea ke te baonikarea ae katabua te karea? Ane tuea n te baonikarea, ao e tuea n te baonikarea ao ni baika i aona ni kabane. Ane tuea n te Temoboro, ao e tuea n te Temboro ao iroun Teuare maeka iai; ane tuea ni karawa, ao e tuea n ana kaintokanuea te Atua ao iroun Teuare tekateka i aona.”
Tibatiba: Kam na maraia ngkana kam kaburei tamneia aomata nako Kenna
Tariu ao maneu ti ongo n te bong aio ana kammaraia Iesu nakoia tan koroboki ao baritaio ibukin aroia ni kewe ao ni mamanai nakoia aomata ba aongkoa a na rairi nanoia nakon te Atua ao ngaia a manga aki ba a kamaneia aomata nakon te mate ae akea tokina ba a na nako Kenna are bon nnen te tang ao te kangengewi are boni mone. Eng ti ongo aron Iesu ni kateterei rekenikaia tani koroboki ao baritaio ae kataboroaki ibukin taboron te bure ae a karaoia. Ba teuana bon te reirei ae kewe mani kairua ae a tungia aomata ao ngaia are a katikaki nanoia iai nakon te bure. Te kauouoa ni bure ba a kairi tamaneia aomata nakon te mate. Eng, bon aio te makuri ae E rangi n un iai Iesu ibukina ba aomata ake a keweaki a bon tia ni karaoa te bure are a kaitikkaki nako iai ao tiaki man oin aia rinerine ao aia iango. Bon aio te makuri ae aki botau ma aron are E a tia ni karaoia Iesu ngke e maraki mani mate iaon te kaibangaki ba a aonga ni kabaraki ara bure ao ti aonga ni kamaiuaki.
Inanon te rawawata ma te kataki ao ti bon kantaningaki ngaira Kiritian ba ti na kaota ana tangira ao ana nanoanga te Atua nakoia raora ni buokia ba a na aki reke n ana kamane teuare buakaka. Ngkana ti kamaiuia raora ao ti bon kakukureia nanon Iesu n reita ana makuri nii kamaiu. Ba kakaraoan nanon te Atua inanon maiura boni ngaia ae na karekea nakoira te kaniwanga ae te kabaia ae akea tokina i Karawa inanon te kabaia ao te mimitong ae aki totoki.
|
Strategic Objectives/Activities |
Timeline |
Key Performance Indicators |
Completion Rate (%) |
|
Strategic Objectives/Activities |
Timeline |
Key Performance Indicators |
Completion Rate (%) |