Wiki 21 Kauabong
Warekan ana Kaotioti Ioane. 21: 9-14
E kawarai te anera, ao e kangai nakoiu: “Nakomai, ao N na kaota neiere kainaba te Tibutetei nakoim.” E uotai nako, n te tamnei, nako aon te maunga ae bati n rietata, ao e kaota nakoiu te kawa ae tabu, ae Ierutarem, ba e ruo mai karawa mairoun te Atua, ao raona mimitongin te Atua. E raneanea n ai aron te atibu ae moan te kakawaki, ba kanga te iatebi ae itiaki n ai aron te kirititaro. E nonoaki n te nono ae moan te rietata, ae tebui ma uoua mataroana, ao i rarikia tengauni ma uoman anera, ao a makoro iai araia baronga ni Iteraera aika tengauni ma uabaronga; ba tenua te mataroa mai mainiku, tenua te mataroa mai meang, tenua te mataroa mai maiaki, tenua te mataroa mai maeao. E katoroaki te nono i aon atibu aika tebui ma uoua, aika a makoro iai araia ana Abotoro te Tibutetei aika tengauni ma uoman.
Te Taramo 144: 10-13, 17-18
Kaekana: Ke a karaoiroiko am aomata, te Uea.
Ke a neboiko, te Uea, am makuri, Ke a karaoiroiko am aomata.
Ke a kaota mimitongin Ueam, ma n taekina makam. K.
Ke a kaongoia botanaomata korakoram, ma raneaneani mimitongin Ueam.
Bon akea tokin ueam, E teimatoa am tautaeka n roro nako. K.
E kakaonimaki te Uea n ana taeka nako, E akoi n ana makuri nako.
E kaani ma akana weteia, Akana weteia ma te koaua. K.
Alleluia, alleluia.
Te Tia Reirei, bon Natin te Atua Ngkoe, Ao aia Uea Iteraera. Alleluia.
Euangkerio
Warekan ana Euangkerio Ioane..1: 45-51
E kaitibo Biribo ma Natanaera, ao e taku nakoina: “Ti kunea Teuare taekinaki n ana Tua Mote ao irouia burabeti. Boni Iesu ae natini Ioteba mai Natareta.” E taku Natanaera: “Ba e kona n reke ae raoiroi mai Natareta?” E kangai Biribo nakoina: “Nakomai, noria!” Ngke E nora Natanaera Iesu ba e nakoina, ao E taekinna ni kangai: “Aei te Iteraera ni koaua, ae akea te kewe irouna.” E kangai Natanaera nakoina: “Ko kanga ni kinaai?” E taku Iesu nakoina: “I maini weteakim iroun Biribo, ao I noriko ngke ko mena i an te biku.” E kangai Natanaera nakoina: “Rabi, bon Natin te Atua Ngkoe, ao aia Uea Iteraera.” E taku Iesu nakoina: “Ngkai I tuangko ba I noriko i an te biku, ao ko kakoaua; ma ko na nora ae kamimi riki.” Ao E manga taku: “I tuangingkami te koaua: kam na nora karawa ba e uki, ao ana anera te Atua ba a wawaerake ma n ruruo i etan natin te aomata.”
Tibatiba: Ke a karaoiroiko am aomata, te Uea.
Tariu ao maneu n te bong aio ao ti a reitaki inanon ara boto n iango ae ti reneia ba ti na bane n reitaki ni karaoiroa te Uea. Inanon te botoniango aio are ti kauringaki iai ba iai te rongorongo ae a kakawaki nakoira ba ti bane ni kaoaki nakon te maiu ae ti na riai ni uaiakinna ba te roko n te kawa ae tabu ae karuoaki mai Karawa mairoun te Atua ae Ierutarem ae bou.
Ngkana ti roko i Ierutarem ae bou ao ti na roko irarikin te Atua ae moan te tabu, moan te mwaka ao moan te mimitong. Bon aio te kawa are ti na nora iai mimitongin te Atua ao ti noria anera ma kain karawa ba a bane n neboneboa te Atua.
Tariu ao maneu ke katauira Iesu ba ti na kona ni katonga te maiu ae na roko ngkana ti nori taian kamimi ni maiura aio ni kakoaua makan ana tangira ao nanoanaga te Atua ibuakora. Ti na butia te Atua ba E na nanoangaira n anganira te nano ae maraurau ae kai ringaki n ana taeka, ana kamaiu ao ana nanoanga te Atua ma te tauraoi ni kakoaua ba Iesu boni Ngaia Rabatan ana tangira te Atua ae ruo mai Karawa ba e na kairira nakon te kawa ae tabu ae onrake n otan mimitong te Atua ae bon Ierutarem ae Bou. E bia ninira ao ni kammakurira Tamnein te Atua ba ti na taka ao ti na ukera Uean te Atua inanon maiura aio ao n aron Natanaera ao ti na kaitibo ma Iesu ma te kakoaua ba ba ti bon kaitibo te Uea ae natin Tawita ao te tia kamaiuia Iteraera