Wiki 21 Katenibong
Warekan ana moa n Reta Bauro nakoia I Tetaronike. 2: 9-13
Tari, kam uringa ara makuri ma rawawatara ngkoa: Ti makuri ni bong ao ni ngaina ba ti na aki karawawata temanna i buakomi, ngke ti taekina ana Euangkerio te Atua nakoimi, ngkami tan onimaki, ao akea burena. Kam ataia ba aron te karo nakoia natina, ao bon arora naba nakoimi. Ti anai nanomi ma ni kaungai ngkami ma ni buti ngkami ba kam na maiu n te aro ae riai i matan te Atua, ae wetein gkami nakon Uueana ao nakoni mimitongina.
Ti aki toki naba ni katituraoa te Atua ngaira, ngkai kam butimaea ana taeka te Atua are ti taekinna nakoimi, ao kam butimaia, tiaki n ai aron aia taeka aomata, ma kam butimaia n arona ni koaua ae bon ana taeka te Atua; Ao e mamakuri naba te taeka anne i nanomi, ngkami tan onimaki.
Te Taramo 138: 7-12
Kaekana: Te Uea, Ko norai ao Ko ataai.
N na raroa ma tamneim ia? N na raroa ma matam ia?
Ngkana I waerake nako karawa, Ko mena iai; Ngkana I wene n te rua, ko mena naba iai. K.
Ngkana I toka ni bain te karangaina, Ngkana I mena i taboni marawa,
Ao Ko kairai ni baim, Ao Ko tauai n ataim. K.
Ngkana I kangai: “Ke e rabunai te ro, Ke e karabaai ron te bong”,
Ao e aki ro te ro iroum, E ota te bong n ai aron te ngaina. K.
Alleluia, alleluia.
A kamatoaki am tua, te Uea, A teimatoa n aki toki. Alleluia.
Euangkerio
Warekan ana Euangkerio Mataio..23: 27-32
Kam na maraia, ngkami tani koroboki ma Baritaio aika tani kewea te aba! Ai aron ruanimate ngkami, aika kamainainaki: a tamaroa tinanikuia, ao a on nanoia n riia mate ao n te maung. Ai aromi naba: kam baka n raoiroi i mataia aomata, ao a on nanomi n te kewe ma te buakaka. Kam na maraia, ngkami tani koroboki ma Baritaio aika tani kewea te aba! Kam karaoi ruaia burabeti, ao kam katamaroai ruaia akana raoiroi, ao kam kangai: ‘Ngke arona ba ti maiu n aia tai ara bakatibu, ao ti na aki raonia ni kamateia burabeti.’ Kam kaotioti ngkami iai ba natia uake a kamateia burabeti! Ma ngaia ae ani kakoroa raoi aroni buakakaia ami bakatibu!”
Tibatiba: Kam na maraia ngkami tani kewea te aba- ai aroia ruanimate ngkami
N te bong aio ao ti kauringaki kakawakin ataakin te koaua are inanon maiura aio ti kona ni waaki inanon kateimatoan te maiu are ti anganaki iroun te Atua ke ni waki n ai aron te tabakeiniku are te aomata are taraki ni maiu ba e ikeike ma ngkana e kabarakaki ao e a toki naba ikekeina. N aron kabarabaran te waaki inanon te maiu ae onraken te maiu ao te bai ae kakawaki ba ti na kateimatoa inanon maiura bon te anganaga te maiu nakoia raora. Tariu ao maneu ngkana arona ba ti maiu ma ti aki anganga te maiu nakoia raora ibukina ba ti maiu inanon te bure ao ti na katotonga te ruanimate are e kona n rangi n tara n tikiraoi mai akuna ba e beniaki ao ni katamaroaki n taian ue ma ngkana ko tara nanon te ruanumate ao akea te bai ae ko na noria ba ti taian rii ao te boira ae korakora.
N te ewangkerio ao Iesu E kabotauia tani koroboki ma baritaio ake bon tani kewe mani mamanaia aomata ma taian ruanimate are tarakia mai tinaniku a tara n raoiroi man tikiraoi ma inanoia ao ao bon on n te bokaboka ma te barekareka ao te maungitoto. Tariu ao maneu ngkai bon aikai ana taeka ni kabotau Iesu nakoia tani koroboki ao baritaio ao ti a kauringaki ikai ba anne naba motikan taekara ngkana ti baina te kewe ba ti aki maiuakina te bai are ti taekinna. E kakawaki iroura ba ti na babaina te kokoaua ni maiura ni karaoa nanon te Atua ni maiu inanon te itiaki ke te maiu n takaramentu. Ti na kauki nanora nanon ana reirei Iesu n te bong ba ti na mamaiuna te eti ao te koaua ba ti aonga n anganga te maiu nakoia raora ao ni karekea te kaniwanga ae a tia ni katauraoia Iesu ibukira are te rinnako n Abanuean te Atua i Karawa inanon te kabaia ma te minitong ae aki totoki.