Wiki 21 Kanimabong
Warekan ana moa n Reta Bauro nakoia I Tetaronike. 4: 1-8
Tari, ti tuangingkami ao ti butingkami i nanon te Uea ae Iesu: kam a tia ni butimaea ara reirei n taekan te aroaro ae kakukureia te Atua, ao kam a kakairi iai ngkai; kam na karaoiroi riki aromi iai. Ba kam bon atai taiani kaetieti ake ti angani ngkami mairoun te Uea ae Iesu.
Nanon te Atua iroumi, boni karaoiroami. Kam na kaki te kamara; e na rabakau te aomata ni baina te rabata ane irouna ma te raoiroi ao te karine n aki ira nanon te kaibabaru, n ai aroia bekan aika aki ata te Atua. E na akea temanna ae na kamatauninga tarina ke ni babakanikawaia n te aro anne. E karekekai te Uea i bukini baikanne ni kabane, ao ti a tia n tuangi ngkami ma ni kaotia nakoimi. Ba E aki weteira te Atua nakon te kamara, ma E weteira ba ti na raoiroi. Ma ngaia ae, ngkana iai ae rawa iai, ao e na aki rawa nakon te aomata, ma e rawa nakon te Atua, are a tia n angani ngkami te Tamnei ae Raoiroi.
Te Taramo 96: 1-2, 5-6, 10-12
Kaekana: Ke a kukurei akana raoiroi iroun te Uea.
E tautaeka te Uea, ke e kukurei aonaba, Ke a kimareirei abamakoro nako.
E rabunaki n te nang ma te ro, Kaintokana, bon te Raoiroi ma te Eti. K.
A neinei maunga n ai aron te nenea, i matan Teuare Uean aonaba ni bane.
E kaota ana eti karawa, A bane botanaomata n nora mimitongina. K.
E tangira ane riba te buakaka, E kawakini maiuia ana aomata,
E kamaiuia mairouia akana ioawa. K.
E oti te ota i bukin ane raoiroi, Ao te kabaia i bukin ane e eti nanona.
Kukurei iroun te Uea Ngkami aika kam raoiroi, Neboa arana ae tabu. K
Alleluia, alleluia.
Reireiai am kawai ma am tua, Ao N na iangoi am makuri aika kamimi. Alleluia.
Euangkerio
Warekan ana Euangkerio Mataio..25: 1-13
E taetae ni kaikonaki Iesu nakoia ana reirei ni kangai: “Aei aroni kabotauan te Abanuea ae karawa: A uoti aia taura ataeinaine ake tengaun ba a na nako ni butimaea te tia iein. A nanobaba niman, ao a wanawana ake niman. A anai aia taura nake a nanobaba, ma akea aia ba. A ua baa nake a wanawana i nanon aia atiniba ma aia taura. Ngke e a iremwe n roko te tia iein, ao a bane ni kataoi mataia ni matu. Ngke e a nukanibong, ao e takarua te aba ni kangai: ‘Ae e a roko te tia iein! Otinako ni butimaia.’ Ao a bane n uti ateinaine akekei, ao a katauraoi aia taura. A taku nake a nanobaba nakoia nake a wanawana: ‘Anganira teutana n ami baa, ba a kani mate ara taura.’ Ma a kaekaia nake a wanawana ni kangai: ‘E na aki tau maitina i bukira ao i bukimi, e raoiroi ngkana kam nakoia tani bobai ni kaboa ami baa.’ Ao ngke a nako ao e roko naba te tia iein, ao a rin ma ngaia n te ru n amarake nake a tauraoi, ao e kainaki te matora. Rimui a roko naba nake raoia, ao a kangai: ‘Te uea, te uea, kauka te mataroa nakoira.’ Ma e kaekaia ni kangai: ‘I tuangi ngkami te koaua: I aki kinai ngkami.’ Ma ngaia ae kam na tantani, ba kam aki ata te bong ma aoa.”
Tibatiba: Babaina te tauraoi ni butimaea te Tia Iein
Tariu ao maneu n te bong aio ao ti reita te maroro iaon kakawakin karekean te wanawana ni koaua inanon maiura aio ba ti aonga ni karekea te maiu ae aki totoki i Karawa.
Ao n aron are e tibaki ngkoananoa ao te wanawana ni koaua bon karaoan ao kaikoan kaubaira n te maiu aio are na karekea nakoia te maiu ae akea tokina. Ao tera te kaubai ae na karokoira i Karawa? Te kaubai aio bon ara makuri ae raoiroi ke aki karaoan te bure ni kamara ke te rawa ni kabarai aia bure raora. Ao e kabontauaki ara makuri aika raraoi ba kanga ai aron baan te taura are ti kainnanoia ibukin butimaean Iesu ngkana e butimaira nakon te bakanimare are ti kaoaki nako iai. Ba ngkana e roko te tia mare ao ti na tiai n tei n tauraoi ni butimaea te Tia mare are Iesu ba e na kairira nakon te baka n amarake are ti kaoaki nako iai.
N te karaki aio ao ti tuangaki iai ba ti riai n teimatoa ni kakaraoa ae raoiroi. Ngkana ti baka ni karaoa te bure ao ti na kataia n aki kamanira ma tin a waekoa ni manga okira te Atua ni bubuti kabaraan ara bure. Ba te bai ae kakawaki ikai ba ngkana E kuneira Iesu ba ti maiu inanon te karatia ngkana e roko ao ngkanne ti na bon rinnako ma Ngaia nakon te bakanamarake are akea tokina. Ti na teimatoa n kaikoi baini eta ao tiaki bain aonteaba ba ti aonga n tauraoi n ira Iesu nako Karawa ngkana e roko ni weteira n ara tai ni mate.