Wiki 22 Moanibong
Warekan ana moa n Reta Bauro nakoia I Tetaronike. 4: 13-18
Tari, ti aki tangiri ngkami ba kam na babanga taekaia akana mate, ba a kawa n rawawata nanomi n ai aroia aomata aika akea aia kantaninga. Ti kakoaua mateni Iesu ma mangautina: ti na kakoauai naba taekaia akana mate i nanoni Iesu, ba E na kairia nako te Atua. Ti na kaongoingkami ae ti ongo iroun te Uea: ngaira aika ti maiu, aika ti na oa okin te Uea, ti na aki rimoaia akana mate. E na ruo te Uea boni Ngaia mai karawa, ngkana e bo taina, n takaruan te anera ao n tangi nana bu te Atua. A na uti moa nake a tia ni mate i nanoni Kristo. Ao rimui, ngaira aika ti maiu, aika ti na oa te tai anne, ti na botaki ma ngaia ni uotaki rake i aon te nang, ni butimaea te Uea i eta. Ao ngkanne ti na aki toki ni botaki ma te Uea. Ma ngaia ae kam na uaia ni kabebetei nanomi iroumi n taeka akanne.
Te Taramo 95: 1, 3-5, 11-13
Kaekana: E nakomai te Uea ni motiki taeka.
Anenea te Uea n te kuna ae bou, anenea te Uea, aonaba ni bane.
Taekina mimitongina nakoia botanaomata, taekin ana kamimi nakon aba nako. K.
E kakanato te Uea, E riai n neboaki, E kakamaku nakoia atua nako.
Atuaia botanaomata, bon taian akea. Bon te Uea are karika karawa. K.
Te kabaia i karawa, te kimareirei i aon te aba! Ke e rurunga marawa ma naona,
Ke e kukurei aontano na baina nako, ke a takarua arokani buakonikai. K.
Ke a bane ni kimareirei i matan te Uea, ba E nakomai n tautaeka i aon te aba,
E na motika taekan aonaba n te eti, ao taekaia botanaomata n te koaua. K
Alleluia, alleluia. Anganai te maiu, te Uea, ao N na ira nanon am tua. Alleluia.
Euangkerio
Warekan ana Euangkerio Ruka. 4: 16-30
E roko Iesu I Natareta ike E kaikawaki iai, ae E rin n te tinakoka, n ai aroni katein te tabati, ao E teirake ni wareboki. E anganaki ana boki te burabeti ae Itaia; ngke E kaeka te boki ao e bo ma te koroboki aei: E mena i aou Tamnein te Uea, ba E kabirai ni katabuai. E kanakoai ba N na uota Te rongorongo ae raoiroi nakoia kainnano, ao N na kaota te bara nakoia ake a kainaki, ao N na kainaomataia ake a karawawataki ao N na kaota te ririki n akoi mairoun te Uea.
Ao E kaina te boki, ae E kaokia nakon te tabonibai, ao E tekateka. A bane mataia kain te tinakoka irouna. Ao E taetae nakoia ni kangai: “E kakoroaki bukin taekan te koroboki anne i taningami n te bong aei.” Ao a bane ni butimaea ana rongorongo, ao a mimi n taeka n akoi ake E atong. A kangai: “Tiaki natini Ioteba Teuanne?” E kaekaia ni kangai: “I ataingkami ba kam nang kaekaai n te taeka ae kangai: Te tia katoki aoraki, ani kamaiuko I bon iroum. Te baere ti ongo ba ko karaoia I kaberenaum, ao karaoia naba I abam ikai. Ao E manga taku naba: “I tuangingkami te koaua: akea te burabeti ae butimaeaki raoi I abana. I tuangingkami: a maiti aine ake a mate buia ibuakoia Iteraera n ana tai Eria, ngke e in kkarawa I nanon tenua te ririki ao onoua namakaina, ao e kabuta te rongo: ma n aki kanakoaki Eria nakon temanna I buakoia ba ti nakon neiere te I Tarebata n te aba are Tiion. A maiti naba rebera ibuakoia Iteraera n ana tai Eritai ma e aki kamaiuaki temanna I buakoia, ba ti Namaan ae te I Turiia.” Ngke a ongo baikanne kain te Tinakoka, ao a bane ni maraki nanoia, ao a teirake ao a katikiia nako tinanikun te kawa. Ao a kairia nakon te tabo teuana ae are winikatatiia te maung are e kateaki aia kawa I aona, ba a na notuia nako mai aona. Ao Ngaia, E ri buakoia n toua nako kawaina.
Tibatiba: N na uota Te rongorongo ae raoiroi nakoia kainnano, ao N na kaota te bara nakoia ake a kainaki
Tariu ao maneu kam kona n tuangai ba tera ngkoa kanoan te kateniua ni miterio n Ota n aron are ti atonga n ara tai ni korana? Eng karaui ngkamai ba N na manga kangoi ngkami: Te Kateniua ni miterio n Ota- Takaruan te Rongorongo ae Raoiroi: Uana butimaean Iesu ae ana Taeka te Atua ae maiu” Eng bon aio kairan te koaua ae kakawaki ibukira inanon te Kaotitaeka nakon Nei Maria ba e na riki n iriko te Taeka ao E na maeka ibuakora. Aio bon kanoan rongorngon ana Berita n Akoi nakoira te Atua ba ti aonga ni karekea te Maiu ae akea tokina are muiokoaki ana Rikitemanna te Atua ae Iesu ba E na karokoa nako aonteaba. Ao tera te kamaiu ae akea tokina ae na anganira Iesu? Eng te moani bai bon angakira ke kaokan te aro n natinaki are a tia ni bua man bakaia ara moan karo are ti a karaureaki iai ma te Atua. Ao ti bane n ataia ba e na manga oki aio ba uan marakin ao maten Iesu iaon te kaibangaki. Eng e na manga riki Iesu ba te kauoman ni Mote are na kairira nakon te aba ni Berita n Akoi are mwngara ni koaua are bon Abanuean te Atua ae Ierutarem ae Bou.
E katereterea Iesu kanoan te bai ae na anganira n te bong aio inanon te ewangkerio are taekin taian muioko are kanakoaki iai Iesu ba e na uotia nakon aonnaba. N te ewangkerio ao ti ongora aron Iesu ni wareka ana taeka te Atua ae kangai: “E mena i aou Tamnein te Uea, ba E kabirai ni katabuai. E kanakoai ba N na uota te rongorongo ae raoiroi nakoia kainnano, ao N na kaota te bara nakoia ake a kainaki, ao N na kainaomataia ake a karawawataki ao N na kaota te ririki n akoi mairoun te Uea.” Ngke E a tia ni wareware Iesu ao E kaina te boki ao E taku nakoia;” E kakoroaki nanon taekan te koroboki anne i taningami n te bong aei.”.
Eng Iesu bon te tia kakoroi nanon taian taetae ni burebaeti ibukin karokoan te kamaiuaki mairtoun Tamara ae te Atua. Ti na bon karekea te kamaiuaki ae akea tokina ngkana ti kaburei maiura n irira Iesu ao n uouota ara kaibangaki ao n ririmuina.