Wiki 22 Kauabong
Warekan ana moa n Reta Bauro nakoia I Tetaronike. 5: 1-6, 9-11
Ti aki bae ni koroboki nakoimi, tari, i bukin te tai ma te bong ae E na roko iai te Uea. Kam bon ataia raoi ba e na roko ana Bong te Uea n ai aron te tia ira ni bong. Ngkana a kangai aomata: “Te rau ma te mweraoi”, ao boni ngaia te tai ae e na rina iai ni bakariia te kabuanibai, n ai aron aririn te aine ae kani bung. A na bon aki kona n tibanako ma ngaia.
Ma kam aki mena i nanon te ro ngkami, tari, ba e na kakubaingkami te bong anne n ai aron te tia ira. Bon natin te ota ngkami ni bane, ao natin te ngaina. Tiaki ana aomata te bong ma te ro ngaira. Ma ngaia ae ti na aki matu n ai aroia akana temangina, ma ti na taratara ao ti na taubang. Tiaki nanon te Atua ba E na karekea kaira, ma bon nanona ba ti na karekea kamaiuara iroun ara Uea ae Iesu Kristo, are mate i bukira ba ti aonga ni maiu ni botaki ma Ngaia i nanon te maiu ke te mate. Ma ngaia ae kam riai ni kaungaingkami i marenami ma ni ibuobuoki, n ai aron ae kam boni kakaraoia.
Te Taramo 26: 1, 4, 13-14
Kaekana: E na nora te Uea i abaia akana maiu.
Bon te Uea otau ma buokau, Antai ae N na makua?
Bon te Uea au nono ni kamaiu, antai ae N na maku irouna. K.
Iai te bai ae butia te Uea, te bai ae I matennanoia:
I bia maeka n uman te Uea ni kabanea au tai ni maiu,
ba N na nora ana akoi te Uea ao N na miakina mwengana. K
I ataia: N na nora ana akoi te Uea, i abaia akana maiu.
Onimakinna, keiaki, kamatoa nanom, Onimakina te Uea. K.
Alleluia, alleluia.
Te Atua, raira nanou nakoim, Ao reireiai am tua Alleluia.
Euangkerio
Warekan ana Euangkerio Ruka..4: 31-37
E ruo Iesu nako Kaberenaum ae kawani Kariraia, ao E reireinia aomata n te bong ae te Tabati. A teke nanoia n ana reirei, ba E taetae n ai aron te aomata ae iai makana.
Iai i nanon te tinakoka temanna te aomata ae taniaki iroun te tamnei ae kamara, ae e korakora banana n takarua ni kangai: “Ai tera am bai iroura, Iesu ae te I Natareta? Ko roko ni kamaunaira? I ataiko ba Teuare Tabu ae ana aomata te Atua.” Ma E boaia Iesu ni kangai: “Kainababu, ao otinako mairoun teuanne.” Ao e kabukitaua te aomata arei te taimonio i aontano, ao e otinako mairouna n aki kamarakia. A bane n rotaki n te maku, ao a kangai i bon irouia: “Ai kamimi ra te taeka anne! E tuatua nakoia tamnei aika kamara ma te maka ao te korakora, ao a otinako!” Ao e buti rongorongona n tabo nako n te aba arei.
Tibatiba: Ti na nora te Uea i abaia akana maiu.
Tariu ao maneu iai uoua taeka aika a kakawaki nakoira inanon maiura aio are a na kaota reken te wanwana ni koaua iroura n aron ana kataninga te Atua. Ao taeka aikai bon te maiu ke te mate ae aki totoki. E ngae ngke e matata iroura nanon taeka aikai bon tabera ae ti riai ni karaoia ba ti na rineia ba tera te kawai ae ti na toua, te maiu ke te mate ae akea tokina. Ao ti kakoaua ba tera ae ti na riai n rineia ma te kanganga ba e rangi ni maiti taian kariri ma kabakabaka ba ti na ira ana kawai teuare buakaka are bon te mate. N te botoniango are ti rineia n te bong are anaki man taekan te taramo n te bong aio are bon ara ingainga n nano ni kan nora te Uea i abaia akana a maiu. Ba aio e kaota te toko ae ti uakainna ba bon abaia akana a maiu. Ba ti na ti roko n te aba aio ti ngkana ti a tia ni maiuna te raoiroi inanon maiura. Ti na roko i abaia akana a mate ngkana ti a tia n rineia ba ti na kakaraoa te buakaka ao te bure are a na karokoira n te mate ae akea tokina.
Tariu ao maneu ti na butia te Atua ba E na anganira te wanawana n rinea te maiu ae aki totoki ba ti aonga n roko ao n nora te Uea i abaia akana a maiu.