Wiki 23 Moanibong
Warekan ana Reta Bauro nakoia I Korote. 1: 24; 2:3
I kukurei ngkai I maraki i bukimi, ao I kakoroa i nanon rabatau marakini Kristo ae tuai ni koro, i bukin rabatana ae te Ekaretia. Ba I riki ba minitan te Ekaretia, i bukin te nakoa ae I anganaki, ae karokoan ana taeka iroumi: bon te miterio are raba i nanon tai ma roro aika nako, ao e a tiba kaotaki ngkai nakoia akana raoiroi. Bon nanon te Atua ba E kani kaota kaubaini mimitongin te miterio anne nakoia bekan: ba Kristo i nanomi ao kantaningan te neboaki. Ti taekina Kristo, ao ti tuangia ma n reireinia aomata ni kabaneia te wanawana ae banin, ba a aonga ni bane aomata ni kororaoi. Ai ngaia ae I kakorakoraai ma ni keiaki, ni korakorana ae makuri i nanou ma te maka.
Bon nanou ba kam na ata korakoran te buaka ae I bae ni buaka iai i bukimi, i bukia akana I Raorikeia ao I bukia riki akana maiti aika tuai n norai ni mataia. A aonga ni kaungaki nanoia ao A aonga ni botaki n te tangira, ao e na reke irouia te ataibai ae kororaoi, ao a na ota ni mimitongin te Atua, are a bane n raba i nanona kaubain te wanawana ma te atatai.
Te Taramo 61: 6-7, 9
Kaekana: Bon te Atua katanau ma au kamoamoa.
Ti te Atua raun tamneiu, E reke buokau irouna.
Ti Ngaia au Ba ma au nono,Ao katanau: I teimatoa. K.
Kataningkami iroun te Atua, Ngkami botanaomata,
Onimakinna n tai nako, Kauki nanomi nakoina,
Ba boni katanami te Atua. K.
Alleluia, alleluia.
Ierutarem, neboa te Uea; E kanakoa ana taeka nako aon te aba. Alleluia.
Euangkerio
Warekan ana Euangkerio Ruka. 6: 6-11
N te tabati teuana, ao E rin Iesu n te tinakoka ao E reireinia aomata. Iai temanna te aomata iai ae e mate baina ae ataina. Uake tani koroboki ma baritaio, a tataraia ba tao E na katoki aoraki n te tabati, ba e aonga n reke bukinana. Ma E atai aia iango, ao E taku nakon teuare e mate baina: “Teirake, ao tei ikanne i mataia aomata.” E teirake, ao e tei. E taku Iesu nakoia ngkanne: “I titirakiningkami: e katauaki karaoan ae raoiroi n te tabati ke ae buakaka? te kamaiu ke te kamamate?” Ao E tarataraia nako, ao e kangai nakon te aomata arei: “Arora baim.” Ao e aroria, ao e manga raoiroi baina. Ma a maraki nanoia, ao a kakarabakau ba tera aroia nakoni Iesu.
Tibatiba: E katauaki karaoan ae raoiroi n te tabati ke ae buakaka?
Tariu ao maneu I taku ba aio bon teuana te titiraki ae kakawaki ba kanoan ara onimaki ni Katorika. Te moani bai ae ti tuangaki man te boki ae te karikibai ba aron te Atua ni karikibai man te ota, baini karawa nakon aonteaba, nakon bain marawa ao manikiba ma maan aika kawakawa ao a nakonako. E kariki bai te Atua inanon onoua te bong man te Maonibong ni karokoa te Kaonobong. Te kabanea ni bai ae karikia te Atua bon te aomata ao n te kaitiua ni bong are aranaki ba ana bong te Atua ao E motirawa te Atua.
Te moamibai ae kakawaki ae ti riai n ota iai ibukin kanoan ara onimaki ni Katorika ae ti riai n ataia ba te Tabati bon ana bong te Atua. Ti kabaeaki ngaira tan onimaki ba ti riai ni karinea ana bong te Atua ae te kaitiua ni bong n aki makuri iai ao ti riai naba ni kaea te taromauri ao neboan te Atua are katauraoia te Ekaretia ibukira. Ti na kaea te tutia ke taromauri ake a katauraoaki irouia katekiti ma tama n te bong aio. Ao ti kabaeaki ian tuan te Ekaretia ba ti na kaea te tutia ke taromauri ake a wakinaki ao akea inaomatara ni baireia ba ti na aki roko iai, ti ngkana iai bukina ba ti aoraki.
Te kauoua ni bai ae kakawaki ibukin te Tabati ba bon te titiraki ae kateaki ba te boto ni iango n te bong aio ba e karaoaki te Tabati ibukin te raoiroi ke te buakaka? Iai naba irian te titraki aio ae kangai ba e karaoaki te Tabati ibukin te aomata ke e karaoaki te aomata ibukin te Tabati? E kaeka aio Iesu ao e taku ba e karaoaki te Tabati ibukin te aomata. E kaotaki naba aio man rinanin ana karikibai te Atua are E moannaba man te ota, aonnaba, karawa, taari, ibukim te aomata. E kamatoa aio te Atua ngke e taetae nakon te aomata ni kangai; tautaeka n te karikibai nako ao kabonganai ibukin maium. Ma E anganira naba ana taeka ba ti na kabongana raoi ke ti na baina te wanawana ni kabongan raoi taian karikibai. Te kabanea ni bai ae ti ongora n te bong aio ba e uki ke aki karaoakin te makuri ae raoiroi n te Tabati. N aron ae teretere n te wareboki n te bong aei ao Iesu e aki tabe ma tuan te Tabati irouia Iutaia ma e kaotia ba te makuri ae raoiroi ae na buaoka te aomata e kakannato riki nakon te tua. Ngkanne karaon te makuri ni kamaiu n te Tabati e bon reita nanon te Atua are e tei ibukin te maiu. Aio are e reita naba Nanon te Atua ibukin ana karikibai ba a karaoaki bai nako ibukin te aomata are karikaki ba katotongan te Atua.