Wiki 23 Kauabong
Warekan ana Reta Bauro nakoia I Korote. 2: 6-15
Ngkai kam a tia n anganaki Kristo Iesu ae te Uea, ao kam riai ni mena i nanona; kam na waka ma n tei i nanona, kam na teimatoa n te onimaki ao a na on nanomi n te katituaraoi.
Taratarai ngkami ba e na akea temanna ae na mamanai ngkami n te kairua ni kamane, ni kawain te rabakau, ae reke man te karaka n aomata ao te katei n aonteaba, ao tiaki mairouni Kristo.
Ba e maeka i nanon rabatana kororaoi te aro n Atua, ao kam botaki i nanona ni kororaoina, ba boni Ngaia atun te Tautaeka nako ma te Maka nako.
Kam a tia ni korotobibiaki i nanona, tiaki n te korotobibiaki irouia aomata, ma bon ana korotobibi Kristo, ao kakiakin rabatami ni kabanea ae te iriko. Kam a tia n taunaki ma ngaia n te babetito, ao kam mangauti ma Ngaia, ba kakoaua korakoran te Atua are kautia mai buakoia mate. Kam mate ngkoa i bukin ami bure ma rabatami ae aki korotobibiaki. E manga kamaiungkami te Atua ma Ngaia. E a tia ni kabarai ara bure ni kabane.
E a tia n taona bairen te Tua, ba E kamauna bokini baera are karawawataira, ba e kanimma n te kaibangaki. E tinanikuia Tautaeka ma Maka ba a na kamamaeaki i mataia aomata, ngke a rimuina n te mananga n tokanikai.
Te Taramo 144: 1-2, 8-11
Kaekana: E nanoanga te Uea, E akoia ana aomata.
N na kamoamoako, te Uea ae Atuau, N na neboa aram n aki toki;
N na karaoiroiko ni katoa bong, N na neboa aram n tai nako, n aki toki. K.
E akoi ma n nanoanga te Uea, E iremwe n un ao E bati n tangira.
E akoi te Uea nakoia ana aomata nako, E tangiria ni kabaneia akana E karikia. K.
Ke a katituaraoiko am makuri nako, Ke a karaoiroiko am aomata.
Ke a kaota mimitongin ueam, Ke a kawakin am makuri aika kamimi. K.
Alleluia, alleluia
I arani ngkami ba raou, ba I kaongoi ngkami ana taeka ni bane te Tama nakoiu. Alleluia.
Euangkerio
Warekan ana Euangkerio Ruka…6: 12-19
Ni bong akekei, ao E nako Iesu nakon te maunga ba E na tataro, ao E tataro n ua te ngaina. Ngke e a ngaina, ao E weteia ana reirei, ao E rineia tengauni ma uoman ao E arania ba Abotoro. Ba Timon are E aranna ba Betero, Anterea ae tarina, Iakobo, Ioane, Biribo, Batoromaio, Mataio, Toma, Iakobo ae natin Arebaio, Timon ae aranaki ba Terote, Iuta ae natini Iakobo, ao Iuta Itikariota ae na riki ba te tia kamane. Ngkanne E ruo ma ngaia, ao E tiku n te tabo teuana ae aoraoi. A mena iai ana reirei ake a maiti ma te koraki ae uanao ake mai Iutaia ni kabanea, mai Ierutarem ao mai rarikini marawan Turo ma Titon: a roko ba a na ongora irouna ao a na kamaiuaki man aorakia. A kamaiuaki naba ake a bainikirinaki irouia tamnei aika kamara; ao a bane te koraki ni kan ringnga, ba e otinako mairouna te maka ae kamaiuia ni kabaneia.
Tibatiba: Neboa te Uea ba e akoi man nanoanga
Tariu ao maneu ti bane ni kakoaua ba e a tia ni kwarira te kamaiuaki are E anganira Iesu mai aon ana kabangaki are maraki mani mate iaona. Eng ti a bane n tia n nora ana kamaiu te Atua iroura ao ibuakora iroun Iesu are a tia ni kaboira n rarana ae moan te tabu are wawanako mai aon te kaibangaki ba ti aonga ni manga okira te aro n natinaki ao n riki ba tan baibai ma Iesu n ta Abanuea ae akea tokina i karawa. N te moan wareboki ao ti ongora aron ana tataro Bauro ibukia I Korote ba e na rikirake irouia ataakin ana akoi te Atua ao ti a tia naba n anaganaki kororaoin te koaua ba E bati n tangira ao man akoi te Uea.
Te bai ae kakawaki inanon maiura aio ba ti na teimatoa n nora ao ni katonga koraoin ana tangira te Atua aio ibukira. Ma ae kakawaki riki ibukira ba ti na teinatoa n nora ao ni kakoaua otan ana kamaiu, ana tangira ao ana nanoanga Iesu Kristo nako aomata. Ti weteaki naba ba ti na teimatoa n reitaki ma Iesu are na kakaboua maiun Tamneina ae Raoiroi inanora ao ibuakora. N aron ae reireinira Mother Teresa ao te bai kakawaki inanon maiura bon te maiu ni kainababu are ti na kona ni karekea te rau inanora ao ti na kona n ongo bananan te Atua ae taetae nakoira n aro aika bati. Te maiu ni kaninabau bon te maiu n tataro ni butia Tamara ae te Atua ana buoka ma ana kakawakin ba ti na teimatoa n onimakinna ba boni Ngaia ae taruaira n tai nako. Inanon te kainababu ao ti kona naba n nora te Atua irouia raora, n te ang ma aroka ao tarira ma manera ao ana inanon ana karikibai ni kabane te Atua.
Ti bia reitaki ma ana karikibai nako te Atua ni kaotia ni maiura ma ara makuri, n ara taetae ma arora ni kbane ba E maiu ni koaua te Atua, Ngaia are ti na riai n neboia n tai nako ba E bati n akoi man nanoanga te Atua.