Wiki 26 Kauabong
Warekan ana Boki te burabeti ae Takaria. 8: 20-23
E kangai Uean aonaba:“A na roko riki botanaomata ma kaini kawa aika ababaki. A nako kain te kawa teuana nakon te kawa teuana, ao a na kangai: ‘Ti na nako ni butia te Atua; ti na ukera matan Uean aonaba; N na bon nako ngai.’ A na maiti botanaomata ma kain aba aika korakora, aika na roko i Ierutarem, ba a na butia Uean aonaba ma n ukera matana.
Ni bong akekei, ao e na kawaraki tatabeman te I Iutaia irouia tatabengaun te aomata man taetae ma botanaomata nako, ao a na taua kunnikaina ma ni kangai nakoina: ‘Ti a raoni ngkami, ba ti ongo ba E mena te Atua i buakomi.”
Te Taramo 86
Kaekana: Neboa te Uea, botanaomata nako.
E kateaki i iaoni maunga aika tabu, Te kawa ae tangiraki iroun te Uea.
E tangira riki Tion te Uea, Nakon ana tabo nako Iakoba. K
E kakanato taekam, Ngkoe ana kawa te Atua.
A warekaki Baburon ma Aikubita, i buakoia akana kinako. K
A taekinaki Biritia, Turo ma Etiobia, ni kangai: ‘E bungiaki iai Naewa.’
Ma e kangai taekan Tion: ‘Tinau.’ Ba a bane ni bungiaki iai aomata. K
E kamatoa ana kawa ni nnena, Teuare moan te Rietata ae te Uea.
E koroi araia botanaomata n te boki: “E bungiaki iaki Naewa.”
Ao a kimareirei ma n anene ni kangai: “A bane n reke mwengaia i nanom.”K
Alleluia, alleluia.
Te Uea, reireiai am kawai ma am tua, ao N na iangoi am makuri aika kamimi. Alleluia.
Euangkerio
Warekan ana Euangkerio Ruka: 9 : 51-56
Ngke e a kan ana tai Iesu ni uotaki nako mai aon te aba aei, ao E mananga ma te nanomatoa nako Ierutarem. E kanakoia ana aomata n rimoana: ao a nako, ao a roko n aia kawa i Tamaria teuana, ba a na katauraoa rokona iai. Ma e tei butimaeakina, kioina ngke E na nako Ierutarem. Ngke a nora anne reirei ake Iakobo ao Ioane, ao a taku: “Te Uea, e uara nanom ngkana ti tua ba e na bakaria te ai mai karawa ni kamaunaia?” Ma E rairaki Iesu n tiringia. Ao a mananga nakon te kawa teuana.
Tibatiba: E kamatoa Nanona Iesu ba E na anko Ierutarem