Wiki i muin te Ephiphany Kauabong
Warekan ana moa n Reta Ioane 3: 22; 4:6
Te bai nako ae ti butia te Atua, ao E na anganira, ngkai ti kawakin ana tua ma ni karaoa ae E tangiria. Ao aei ana tua: Ti na kakoaua aran Natina ae Iesu Kristo ao ti na itangitangiri n ai aron are e tuangira. Ane kawakin ana tua, ao e maeka inanon te Atua ao E maeka te Atua i nanona. Ti ataia ba E maeka i nanora iroun te Tamnei are E anganira.
Ngkami aika kam tatangiraki, tai onimakina te tamnei nako, ma kam na kataia tamnei ba a nako mairoun te Atua ke a aki, ba a maiti burabeti ni kewe ngkai iaon te aba. Kam na kina Tamnein te Atua n aei: te tamnei nako ae kakoaua Iesu Kristo ba E roko n te rabata, ao boni mairoun te Atua. Te tamnei nako ae aki kakoaua Iesu Kristo, ao bon tiaki mairoun te Atua, ma bon tamnein te Antikristo: kam a tia n ongo ba e na nakomai, ao boni iai ngkai i aon te aba. Ataei, kam a tia n tokanikai i aoia, ba boni mairoun te Atua ngkami. Ba E kakanato riki Teuare i nanomi nakon teuare i aon te aba. Boni mai iaon te aba ngaia, ao aia taeka bon taekan aonteaba, ao e ongo aonteaba irouia. Boni mairoun te Atua ngaira, ao a ongo iroura akana ata te Atua, ma e aki ongo iroura ane tiaki mairoun te Atua. Boni ngaia ae ti kina iai tamnein te koaua ao tamnein te kairua.
Te Taramo 2:7-8, 10-11
Kaekana: N na anganiko botonaomata ba am bai.
E kangai te Uea nakoiu: “Natiu ngkoe, I karikiko n te bong aei.
Bubuti, ao N na anganiko botonaomata, ba am bai,
ao tabon aonaba ba abam.” K
Uea, karekei wanawanami, karekei ongomi, tani moti i aon te aba:
kam na toro iroun te Uea ma te maku, kam na karinea ma te ruru. K
Alleluia, alleluia.
E nora te toa ae ababaki te botanaomata are n te ro; e oti te ngaina ae raneanea
i aoia kain te aba n ro. Alleluia.
Euangkerio
Warekan ana Euangkerio Mataio. 4: 12-17, 23-25
Ngke E ongo Iesu ba e kabureaki Ioane, ao E okira Kariraia; E kitana Natareta ba E maeka i Kaberanaum i etan te nama, i aban Teburun ma Nabetari. E kakoroaki iai bukin ana taeka te burabeti ae Itaia, ngke e kangai:
Aban Teburun, aban Nabetari, Kawain tari, te aba ae i manikuni Ioretan,
Kariraia ae abaia botanaomata! E nora te ota ae ababaki te botonaomata
are mena n te ro; e oti te ota i aoia kain te aba ni mate ae ro. Mai muin
te tai anne, ao E moana ana reirei Iesu ni kangai: “Rairi nanomi, ba e a
kaan te Abanuea ae Karawa.”
Ao E kabuta te aba ae Kariraia, n reirei i nanon aia tinakoka ma n taekina Rongorongon te Abanuea, ao E katoki aoraki ma mamara ni kabane irouia aomata. E roko taekana i aon Turia ni kabuta, ao a bane n uotaki nakoina aomata ake a kainnano n aekan aoraki ma rawawata nako, ake a taniaki irouia taimonio, ake a inimaki ma ake a naakibaina; ao E kamaiuia. Ao a manga rimuina aomata ake a uanao, ake a roko mai Kariraia, Tekabori, Ierutarem, Iutaia ao mai mainikuni Ioretan.
Tibatiba: Bon ara bai ni kabane te kamaiuaki
Inanon te Kiritimati aio ao ti bon kauringa aron bungiakin Iesu te Tei i Beterem ao aron uotan te rongorongo aio nakon tan kawakin tibu are a kaongoaki irouia Anera are kangai nakoia, “Noria I uota te rongorongo ae moan te kakukurei nakoimi n te bong aio ba E a bungkia n te bong aio i Beterem te Messia ae Iesu te Tei. Kam na nora te Tei ae niniraki n te kunikai ao e kaweneaki inanon nnen kanaia maan n amarake irarikia Maria ao Ioteba.”
Tariu ao maneu tao e na bon kona n reke iroura te titiraki ba bon antai raoi are nanonaki ibukia rongorngon te Kiritimati? Ibukia kain Betereem ke antai? N te toa ae te Ebibane ao ti kakoaua iai ba te Kitimati ao ana kamaiu te Atua bon te rongorongo tiaki ti ibukia Iutaia ma bon ibukin te aonnaba ae banin. Ba n te Ebibane ao ti ongora taekaia ueani mainiku ake a tuangaki inanon kaotin te Itoi i Karawa ba E a bungiaki te Uea ae moan te kakannato are E na tautaeka tiaki ti iaon Iteraera ma bon n te aonnaba ae banin. Ba ueani Mainiku a bon mananga mai itinanikun Iteraera ao a kairaki n te Itoi mai Karawa nako Betreem ba a na angan Iesu te Tei aia baintangira aika te ribano te kora ao te mura. N te toa ae te Ebibane ngkanne ao e kakoauaki iai ba rongorogon te kamaiuaki bon te rongorongo nakoira ni kabane. Ti bane ni weteaki inanon te toa aio ba ti na bane ni butimaea Otan Iesu te Tei ae bungkai nakoira ao ti na manga uotia ao ni karokoa nakoia aomata ni kabane. Ba man karokoan Otan te kamaiuakai aio nakoia tarira ma manera ao ti na karekea te kaniwanga ae kakawaki are bon te rinnako ao te maeka n te Abanuea ae Karawa inanon te kabaia ao te mimitong ae akea tokina. Tariu ao maneu e koaua ae boni ngaira ni kabane bon ara bai te kamaiuaki iroun Iesu are E a tia ni mate ibukira iaon te kaibangaki ba aonga ni kabaraki ara bure ao ni kaokaki nakoira te aro n natinaki. Ti na bane ni kaeka ana wewete Iesu nakoira ba ti na kakeaira i bon iroura ao, ti na tabeka ara kaibangaki ao ti na ririmuin Iesu ni katoa ba e aonga n otanako ana tangira ma ana kamaiu te Uea nakoia raora ao ti aonga ni karekea te kaniwanga ae te kabaia ao te mimitong ae aki totoki n te maiu ae na roko i Karawa