Ngkana ti takarua ni kangai “Tamara ae te Atua" Ti kaotia n oini wiira ba te Atua ae Uean aonnaba boni Ngaia Tamara, ti boni kaotia ba ngaira aika aomata ti a tia ni bane ni weteaki man arora n toronaki nakon te aro n natinaki Iroum. Ti ataia ba inanon te natinaki ao ti a riki ngaira ba tan baibai Irarikim n te Abanuea are i Karawa. Are nanona ba ngkana e reke iroura te Abanuea ae Karawa ao ti na riki ni katotongko inanon te maiu ni mimitong ao ni kimareirei ae aki totoki. Ao ngkai Ko maeka i Karawa ao ti kakoaua ba E na tabuaki n tai nako Aram ao bon am bai n tai nako te maka ao te neboaki n aki totoki.
Ti butiko te Atua ae Tamara ba ko na buokira n tai nako ni maiura aio ba ti na teimatoa ao ni kakaonimaki n riki ba tan kakaraoa Nanom ao tan neboa Mimitongim. Kawakinira ba ti na aki kona n raurenako ma ngkoe ao anganira te kaniwanga ae Ko a tia ni katauraoia ibukira are te kona ni maeka irarikim i Karawa inanon te mimitong ao te kabaia ae akea tokina. Nei Maria ae Tinan te Atua ao tinara naba Ko taui baira n tai nako ao kairira inanon kawain Natim ae Iesu. Nei Maria buokira ba ti na kabanei bongin maiura aikai ibukin karaoakin Nanon Natim ae Iesu ba ti aonga ni kona n te taina n reitaki ma anera ao kaini Karawa n neboa te Atua ni kangai’ “Tamara are i Karawa E na tabuaki Aram”.