Mauri ngkami tariu ao maneu n ana tangira te Uea!
N te moan wareboki ao ti kauringaki iai aron kakororaoan raoiroin Iesu n te maraki are e anganaki ni matena iaon te kaibangaki. Aio te maraki ae moan te kanganga iroura ba ti na ota iai ao man kona raoi n rin inanon marakina ma kananoangana. Ba man marakin Iesu ma kananoangana ao a a kakororaoaki iai arona are moan baan te raoiroi ngaia. Bon ngaia te Tia Reirei ae e raoiroi.
Ma ngaia ae Iesu e aki ti maraki n rabatana ba e maraki naba n tamneina riki mairoun te tamnei are e buakaka n aron rongorongon teuare e taniaki n te tamnei ae buakaka n te evangkerio mai iroun Santo Mareko 1:21-28. E rawawata nanon Iesu ba e ataia ae e tautaekanaki nanon ana aomata iroun te tamnei ae buakaka ao e un man tuangnga ngkekei naba ba e na kainababu ao man kitana nanon teuarei.
Ti a ataia ae E bon aki toki n rawawata tamnein Iesu n noria ba ti tautaekanaki iroun te tamnei ae e buakaka, kioina ngkai bon ngaira ana karikibai Tamana. Bon ngaira ana auti ngaia are ngke e noria ba e mena te tamnei ae e buakaka inanon ana auti are bon nanon teuare e taniaki ao e taetae ma te mwaaka man kanakoa naba ngkekei te tamnei are e buakaka arei.
Ti nora aron mimia aomata ake i Kaberenaum ngke a noria ba e reirei ma te maka. Ngke e tuanga te tamnei ae e buakaka ba e na kitana te mane arei ao e ongo naba ngkekei. Ngaia are e kauringira naba ikai Iesu ba rinanon te maraki ao bon iai te kororaoi ao te kona naba ni karekei riki kakabaia mairouna n aron te taetae ke te reirei ma te maka.
Ti a bubutia Iesu n te tai aio ibukin ana bai n tangira ae te kona n noria ba ni marakira ao a na iai te rikirake inanon te raoiroi ao te kona naba ni kakioia nako tamnei aika a buakaka ma te onimaki ae e korakora ba tiaki ngaira ae ti kakioia nako ma bon Ngaia are e mena inanora n taai nako ao e anganira te maka ni makuri n arana ae moan te tabu.