Ai tikiraoira karakinan Santo Baraniko mai Atiti! N te tai teuana ao e toka n ana aoti ao man roko n te tabo teuana are e nora iai te rebera temanna ae e on rabatana n te m'akoko aio. Ngke e noria Santo Baraniko ao e rotia te nanoanga ao e ruo man ana aoti man anai ana mane ni kabane man buana ao e karinna ni bain te rebera aio ao man rabata te rebera ni kaota ana nanoanga nakoina. N te rongorongo ao e riki te bong aio iroun te Santo aio ba te bong are e ringaaki iai n ana tangira te Uea ae akea iaon te tikiraoi ao e bitaki maeuna nakon te maeu ae tabu.
Ni bong akekei ao a bon rangi ni kawa rebera n taabo nako. Iai te ribooti ae a kabaeaki beero iaoia rebera ba aonga n rerebwerebwe ngkana a nakonako ao man ataaki ba a mena ia. Ngkana a ongo aomata aia beero aio ao a bon kawaekoaia ni birinakon iteran te kawai are teuana ba a rawa n ewekaki n te aoraki aio. Bon te aoraki ae moan te kananoanga te aomata ngkana e reke irouna. Ngaia are ai bon antai ae e na kan reke irouna te aoraki aei?
Te mane ae e taekinaki n te evangkerio ao tao e a bon tia n ongo taekan ana katoki aoraki Iesu ai ngaia are e korakora nanona ni kan kaea te tabo are e na nakonako iai Iesu ba e aonga ni butia ba e na katoka reberana.
Ai tikiraoira ana karaki: Ngkana nanom ao ko kona ni kaitiaki. N ana onimaki ae e korakora ao e tabeka banaana nakon Iesu man aki kan kairoroa Iesu ba e na kamaeua ma e kangai ti ngkana nanom.
E rangi n rotaki Iesu n te aeka n taetae aio ao e kaeka ngkekei naba man kangai, 'bon nanou, ko na itiaki' ao e itiaki man reberana ngkekei naba. E raba te Uea, alleluia!
Ko raba Iesu ba ngkai ko kaeka ana bubuti te mane aio ao ko anganira te unga n nano ni kan kaoka naba ana taeka te rebera aio man kangai, 'ngkana nanom te Uea, ao kanakoi reberan nanora ni kabane, ba ti a bubutiko', taiaoka'