E kauringia Baritaio Iesu ibukin te bong ae te Tabati ba bon Ngaia uean te bong anne. Ngkai bon Ngaia uean te bong aio ao ngaira ake ti kan kabongana te bong aio ni karao makuri ake ti bon tabe iai ibukira ao ti bon riai n kaeta Iesu ibukin kabonganaan ana bong aio. Bon Ngaia ni koaua uean te Taabati.
I uringa ongoraau iroun temanna te aine ae e kekeiaki n iriira nanon Iesu, ao e taekina aron ana anga nano nakon Iesu ibukin karinean te bong ae te Taabati. E motikia ba e na taona nanona man te nako ni bingko. E wareka ana Baibara ao man tiku n iangoi kanoan ana wareware ao e taona nanona man karaoan makuri ake a na kamatauninga teuare Uean te Taabati.
Ao ngaira tariu ao maneu tera arora ni karinea te bong ae te Taabati ba ti aonga naba ni karinea Uean te bong aio?
E rangi n tamaroa ana motintaeka te Atua nakon Aberaam ibukin ongotaekana ma kakarinean te Atua n arona nako ao e kangai, 'N na kabatia kabaiam ... ao N na kamaitiia am kariki". E tuea iaon ana taeka aio ao e taekinaki n te moan wareboki ba ' a aki kona ni bitaki... ao a aki kona ni kewe".
Ti a kai ni karaba te Atua n ana taeka aikai ba ti kakoauai ao n onimakini ae a bon aki kona n bitaki ana babaire ma ana motintaeka ao a aki kona naba ni kewe. Ko raba te Atua.
Katauira Atuara ba ti na kakarinea natim are bon Ngaia Uean am bong ae te Taabati ba ti aonga ni kona n kakukureia nanom ao ni kona naba n anga te katoto nakoia tarira ma manera ake a tuai n kinako ma Natim. Ti a butiiko aikai n aran Natim ae ko tatangiria ae Iesu Kristo. Amen.