Ngkana arona ba ti a tia ni karaoi makuri aika a bati man raoiroi nakoia aomata, tera ae ti karaoia? Angiin te tai ao ti kantaninga te karabaaki ma te kamoamoaki!
N aron ana makuri Iesu ni kamaeuia aomata aika a rangi ni bati ao e na bon aki reke aron warekan te karabaraba ma te kukurei ibukin ana makuri aikai. E na bati te karongoa ma te tatakarua ao e na karongoaeaki arona nako aikai mai tabon te kaawa teuana ma teuana. Ma ti nora Iesu ba e aki roko ibukin karaoiroana ma karab'aakina irouia aomata e bon ti roko ibukin buokan kainnanoia. Ti noria naba ba ni katoa tai ae e tia ni karaoa te makuri ibukin buokaia ma kamaeuakia aomata ao e bae n kararoa man kaea te tabo ae a na ti ngaia iai ba e aonga n reke ana tai ma Tamana.
Ti reireinaki n te Baibara ba ngkana ti anga baitangira ao ti na karaoia n te aro ae e na aki ataia raom ane i rarikim (Mataio 6:3).
Ti kona ni karaoi makuri ibukin Atuara tao rinanon temanna tarira ke manera n akea ae e na ataia? Ti kona ni karaoia ao man m'aninga taekana ao ni manga reitia nako nakon temanna ao manga temanna riki ni karokoa ae e a aki reke warekan te makuri ae raoiroi are ko a tia ni karaoia nakoia tarim ao manem nako? Ao tao tiaki ti te makuri ma te tataro naba ao ai moara riki aro n taetae ni kawai aika a na karau nanoia raora man angania te kona ni keerakea te tamaroa riki ni maeuia. Ngkana ti kona ni karaoi aikai n aki mm'annanoi kamoamoakira ma karabaakira ma ti katikui nakon te Atua ba neboana ao e na bon Ngaia n te tai teuana ae e na karekei kanuangan ara makuri, ara tataro ao ara taeka aika a raraoi n te tai teuana.
Ti a boti nanora n bubuti ana buoka te Uea ba ti aonga ni kona n kan kakaraoa ae nanona ni maeura aio man kataua maeura aio ba te tai n waaki ni itangitangiri ma tarira ao manera ike ti na neboa iai raoiroin ana makuri Atuara nakoira n te bong teuana ma teuana ni karokoa te tai are ti na botaki ma ngaia n te aba are e a tia ni katauraoia Natina, Iesu ibukira ni kabane.