Ti karaba Iesu ba e ngae ngke e tuangira ae ti riai n tiba rabakaura ma otara nakoia raora ma e bon aki kairoroira ba ti na karaoia, ngkana ti aki kan tibaia ao ti ataia ni koaua ba e kainaomataira iai. Ma ti bon riai naba n uringa ba e bon kangai naba ane iai taningana ao ke e ongo.
E teretere raoi ana kauring ibukin aron kabonganan taningara ba e tuangira ae ngkana arona ba ti bon ongo te babaire ao man manga bon baireia nakon takun nanora ao e kauringira ikai ba te baire ane ti kabonganai man baireia ibukia raora e na manga bon kabonganaaki ibukira ao man karakaaki riki aron bairean taekara iai.
I taku ba ti bon riai n taraia ba ti ota raoi n aio, ti riai ni kamatoa otara iai ao man mm'annanoia n taai nako ba ti aonga n aki baireaki taekara n te aro ae e na rangi ni karawawataaki iai tuara.Ane iai taningana ao ke e ongo!
Ti kaitauko Iesu ba ko bon tatangirira ao man nanonibui iroura n taai nako ba ti na aki reke n te kanganga. Ko tangiria ba ti na kabonganai taningara man kaeti otara raoi ni baai aika ko tangiri ibukin kamaeuan tamneira. Ko rawa ngkana ti na katuaeaki man baireaki taekara nakon are ti na bon rangi ni katuakaki raoi iai. Ko tangiria ba ti na kamaeuaki.
Ko a aitau ni matem iaon te kaibangaki ibukira ba ko kaota iai nanon ao rababan am tangira ibukira. Ko anga maeum ibukin kamaeuakira. Ko kariaia tabekakim rake iaon te kaibangaki ba ko na noraki ni nnem ieta ni mate man kawa ibukira. Bon te ota ngkoe Iesu. Katauira ba ti na kona ni kakaotiko ba bon otan te maeu ngkoe tai katauira ba ti na karabako ian te baketi man kainiko inanora ma anganira te ninikoria ni kona n taetaekiniko nakoia raora riki ake a tuai ataiko ni maeuia. Kauki taningaia ao katauia ba a na ongo man ota raoi ibukin kan kamaeuakia iroum. Iesu, aikai taningara katauira ba ti na kabonganai raoi man kakauongo raoi nakon am babaire.