Bon Erote are e tua korean roroan Ioane te tia Babetito. e riki nikaraoa aio imwin kabwakaan ana taeka nakon natin neiere Eroria, are bon buun tarina are Biriboma are e manga iein ma ngaia. Ngke e nora te aro aio Ioane te Tia Babetito ao e tuanga Erote ba e bon aki riai n iein ma bun tarina ba e bure. E aki rau nanon neiere Eroria ngke e ongo ana taeka aio ae e ririribaia. Ngke e a reke te tai are e kakaea nanona iai natina are e a tia ni kakukureia nanon Erote n ana maie ap e aki tabwara tinana ngke e tuangaki iroun natina: "tera ae N na bubutia Erote?" ao e kaeka man tuangnga ba e na tangira atun Ioane te Tia Babetito inanon te raurau. E bon aki nanoraoi Erote n te bubuti aio ma e bon kakoroa nanona kioina ngke e a tia ni kabwaka ana taeka ae e na bon riai ni karekea nanon ana bubuti te ataeinaine aio.
Tera raoi ae e karekea te tiritiri aio? Bon te aki rau n nano ibukin waeakin te aro ae e aki eti. tera te aro aio? bon te raure ao te manga iein n te aro ae e aki eti. Ai batira te aro aio ni karaoaki n te maeu aio. Ti raure man ara mare e ngae ngke ti ataia ba e bon ririba te raure te Atua, Maraki 2:16. E kangai naba Iesu; "Ao ngkanne akana e a tia ni botiia te Atua, ao ke e tai karaureia te aomata".
Ba eng e aera ngkai ti raure? Iai aika a raure ba a tia n aki karaurau n iangoa moa aron aia mare. a tangira moa ao man iein imwain aia mare ke a katekatekaki ibukina ba a kinaia aia karo; ke akea raoi oin aia taeka ba a kaieinaki naba irouia aia koraki; ke a kua n tataninga tain aia mare ao a bati riki. Iai aika a kekeiaki ni kawakina aia mare ao a tekateka ma te kekeiaki ba a kawa natia ngaia are e raoiroi riki ae a na kekeiaki n tangiria i bon irouia e ngae ngke e a bane te tangira aio ai akea tangiraia i bon irouia. Iai ae a rawa n katarabuaka aron aia boraraoi aia karo ao a tekateka ma te kairiribai man bakaea te kukurei ma ngkana e roko te tai ni matu n ikotaki ao a keiaki ma te nanorawata man keiaki ba e ti kakawaki ae a taraaki ao taanga.
Ma antai ae e na karikirakea te tangira i marenaia taanga? irouia ake a mamara aia tangira i marenaia? Bon Iesu Kristo are Atuara ngkoananoa, ngkai ao n te tai ae e na roko. Bon ngaia ae e na kona ni manga kaonrakeira n ana tangira are ti na kona iai n kawakini ara mare ake e a tia ni botira iai Tamana ba iriko aika ti te irikona. Ti a tataro man butia Iesu ana karatia ibukin kaurarakean ara tangira ngaira taanga ake ti a tia nimareaki i matan te Atua ao ngaira ake ti kekeiaki n nikoa aron ara mare ake a tia n uruaki ao aika iaon kawaia ni karekei aia mare imatan te Atua ba e na bon nanoangaira Atuara ao man anganira ana tangira ngaia are ti na kona n tabwaia imarenara ma ake ti tangiria.
Ti na bane ni kabaia n ana tangira Atuara ae e bati n tangirira.