E kauringira Ebera n te moan wareboki taekan te anga karea n nebonebo nakon te Atua. Ba e bia riki maeura aio ba te maeu n nebonebo ike ti na neneboa iai te Atua ibukin raoiroina ma ana tangira nakoira n tatabemanira nako. Ti tuangaki ba te ibuobuoki imarenara riki nakoia raora ake a aki bati aia bai, ake akea kanaia, ake a akea mwengaia, ake a kainaki n te o ni kaikain ke n aekaia ni kananoanga riki aika ti noori ba aikai bon rabatan te Atua ake ti kaitibo ma ngaai iaon te aba. N te aonaaba aio ao e bora ni baki te Atua man akea oneana, e rotaki n te mariri ma te kainnano ao ti riai n noria n arona aio ao man nanoangaia. Ti tuangaki ba ngkana ti karaoa aio ao te Atua e na bon uringi aron ara makuri aikai ao e na manga bon kabooi mwia i Karawa. Ba te nanoanga bon uoua aekana, iai te nanoanga ikai iaon te aba ao iai naba te nanoanga i Karawa are ngaira aomata ti kaotia n te akoi ma te tangira n arora n aomata ma te Atua e na bon kaota aron te nanoanga aio i Karawa ngkana ti roko irouna imwin maeura aio.
Ni maeun Iesu iaonteaba n taai akekei ao e kaota aron te nanoanga ngke e aerake man te boti ao e nori maitia aomata n roko imwaia n te tabo are e kaea ma ana reirei. E koreia Santo Mareko ba "e rotaki nanona n nanoangaia, ba ai aroia tiibu aika akea te kawakinia". E taona nanona man kuana ao ingaingan nanona ni kan tiku n tingaia ma Tamana ba e na bon aoria ni motirawa man ongora riki irouna buokana ma reireiana arona riki. E bon bae n rangi nikua man karia te motirawa ma ibukin nanona n nanoanga ao e bua kuana ao e tekateka man reireinia te koraki aio.
I taku ba a bon rotaki naba ana reirei n te kua ma a bane naba n ira Iesu man anga kainnanoia ibukin te koraki ae bati ao a raona Iesu n tekateka ma ngaiia.
Ao ngaira ti na kona naba n nora kawaia raora ake a roko ni kawarira ao man tangira buokaia mai iroura n aanga aika a kakaokoro ke ti na un ao man tuangia kain ara auti ba a na kaokia nako ao man tuangia ba ti a motirawa man matu? Tao ti na ienikuri man tuangia ba e a bo te tai n okiri mwengara man ara makuri ma a manga oki te taina?
Ti a tataro man butia Iesu te nanoanga ba e bia kaonrakeira n ana nanoanga are ti na kona naba ngaira n uouotia man tibaia nakoia tarira ao manera n aia tai ni kainanoa buokaia mai iroura.