Kanan Tamneira...

N tain Karikan Baai ao e taetae te Atua nakoia maan ni kangai,"Kam na kakariki mani kamaiti ngkami, ao kakeboa marawa, ao ke a maiti mannikiba iaon te aba." ao E a manga taku nakoia aomata, "Kam na kakariki ma ni kamaitingkami. Kaona aonaba ao taua taekana. Kam na tautaeka i aoia ikani marawa ma mannikiba i karawa ao manin aon te aba ni kabaneia." Ma e ngae ngke e kataua te aomata ba e na taua taekan aonteba ma baina nako ao ngaira aomata ti bon waaki naba ma te maaku ao te nanououa n taai nako. E aera? Ngkana ti tara Ruka 10:19 ao e kangai Iesu: " ...I a tia n anganingkami te maka n toubekaia naeta ma tikaobian ma n totokoa korakoran te kairiribai, ao akea te kabuanibai ae e na reke iroumi,..." Ti riai ni kakauringa aio ba e reke iai kakorakorakira inanon maeura aio riki ibukin kaitaraan te kairiribai are aiara n te maeu aio. Ti na bon aki maaku iai. Imwiin ana kariki bai te Atua ao e motirawa ba are bon te Tabati te bong anne. Ni motirawana ao e karaoiroi ana makuri nako ao man katabui ma te bong ae te Tabati. Aio kakawakin te bong ae te Tabati are ti bia bane n noria n te tai aio; ba ti noria ae e karaoiroi man katabui bwaai ma aomata iai te Atua man aki maninga ae e karaoa aio n ana tai nimotirawa. Ti kainnanoa te motirawa man baai nako. N te motirawa ao ti nora iai te manga kamarurungaki ae e boou ba bon aio ae e kaotia nakoira iai te Atua. Kawakina ao kabongana te motirawa ao riki n te bong ae te Tabati. Bon ara tai ni motirawa ma te Atua ae Tamara. E na rangi n raoiroi ngkana ti kona ni kabanea ara bong anne ma Ngaia inanon te kainababu. E bia riki ba ara tai nikaraoiroaki ao man katabuaki irouna imwain manga te wiiki ae e boou. Ngkana e aki rereke ara tai ni motirawa ma te Atua ao ti na kunea ae e mamara ara iango ara kantaninga ao ti noria ae karaoi ara makuri n akea nanora iai. Ti kabara bae n makuri iai n ai aroia Baritaio ake a wareka Ana Taeka te Atua n aki ongo nanona, a atonga aia tataro n riaia ma akea nanoia n te tataro are a atonga ba ti karaoia ara makuri ke ara tataro ma te taneiai ma ti bon aki ongo nanoia ke n aki atongi ma nanora nikoaua. Ti karaoia ma te bobokewe. Ti kai keweia aomata ma tiaki kona nikewea te Atua! Ti a boti nanora man butia Atuara ae kinaira mai tabon waera nakon atura ba ti na karaoi ara makuri ma nanora nikoaua n taai nako.