Ngkana iai ae e kan irai aoke e uota ana kaibangaki ao e irirai. Aei bon ana taeka Iesu nakoira. Ma ai bon kangangara tabekan ara kaibangaki ibukina ba a bati aekakina. Angiin te tai ti bon rinei ara kaibangaki aika moan baan te kanganga uotaia. A riaon ara kona. ti bon manuokina ana taeka Iesu are e a tia n tuangira naba. Weteai ngkana ko kainanoai.
Ma ngkana ti bon karaua n iangoia aekakira te kaibangaki ae e na katauira te Uea ba ti na uouotia ni maeura aio. Ni bon te koaua e aki kona n anganira ara kaibangaki aika ti aki kona uotaia. E atataiaomata te Uea ao ena bon anganira te kona ni kaitarai kaibangaki aika e a tia ni kataui ibukira. E bon raoiroi te Atua e aki tangiria ba ti na bua ke ti na aki kamaeuaki. E korakora nanona ni kan karikira ba taan makuri ibukina.
N ara kaibangaki ake ti anganaki ti bia kona ni manga uouoti ma te kantaninga ba n taraan ana kaibangaki Iesu are e a bon tia naba ngaia n uouotia nakon te tabo are e na mate iai ao ti na bon kamaeuaki naba irouna iai. Te kaibangaki ae ti uouotia bon akea kabotauana ma te kaibangaki are e uouotia Iesu. E riki ba kamaeuara ana kaibangaki are e uouotia.
N ana kaibangaki Iesu ao ti noria ba a kabaraki iai boon mwin ara bure, ti kainaomataki iai man te bure, ti anganaki te maeu are akea tokina. Ti na boti banara ni karaba Iesu ibukin ana kaibangaki ae ti kamaeuaki iai. A bia riki ara kabangaki ba uotara ni kaea te kameauaki are akea tokina.