N te moan wareboki ao e taekinna te Burabeti ae Itaia ba ngkana ti kawakina man karinea kakawakin te bong ae te Tabati ao n aki wiwinanti ao ti na bon kunea te kukurei ae bati iroun te Uea.
Ngkana ko tataro ni bubuti buokam ao e na anganiko, e na kamatoa am onimaki ao e na karekei kanoan am bubuti ni kabane. E na bon karikiko ba te baro n ran are e onrake n te maeu are mai iroun te Tamnei ae Raoiroi. E na bon aki toki n raoniko n taai nako ba e kukurei iroum. Ma e na bon bane n reke aikai ngkana ko bon baireia man motikia ba ko na tangira te maeu ni kukurei inanona. E na bon aki anganiko ngkana ko aki bubuti.
Ma ngkoe tariu ao maneu, tera ami iango? Kam tangiria ba e na reke te kukurei iroumi? Ngkana aio nanomi ao riin inanon te Karemo ma te nano nikoaua. Noria ba n te Karemo aio ao kam karaoa te eti nakoia raomi, kam kamarakeia kainnano, kam kunikaia ake akea oneaia, kam karaka ami ibuobuoki nakon te aro man aki taua ami kare mangko, kam buokia kainano ao Taan ibuouboki nakon te aro. Kam kabatia am kekeiaki ni karaoi baika a raraoi ba e na neboaki iai Atuara are bon Ngaia muiokon maeura ma arora nako.
Ti miakina aron maeuia ana reirei Iesu ma kakabaiaia n irira Iesu ao man kaeka weteaia mairoun Iesu. Rewi are bon Mataio are e ongo weteana iroun Iesu ao e katukui bwaai ao man kitani man iriria. Ngke e katuka ana baoki ni mwane man rimwin Iesu ao I ataia ae ti bon bane ni kangai; 'ai aki akora te aro aio! ao ai antai are e a baini baai akekei.
N tabetai ao e taonira aron mataiakinan kaubain ma baikorakin te maeu aio ao e tauira man kawaekoakira n rimwin Iesu ke n ongo banaana ni weweteira.
E bia riki te tai aio ba ara tai n tuoi nanora man titirakina Iesu ni kangai: " Ko weteai Iesu?"