Man ana kauring Iawe n te moaniwareboki nakoia natin Iteraera ni baai aika a kona ao aika a aki kona ni karaoi ni karokoa ana koroboki Santo Mataio ibukin rokon Iesu ni kamaenakoia uake a raoiroi ma uake a buakaka are e na kamenaia raoiroi n angaataina ao buakaka i angamaingina ao ti kauringaki iai aron rawawatan te bure ake ti na karaoia nakoira ao nakoia raora. Ti bon kauringaki naba kakamakun te rekenikai nakoia ake a buakaka ba a na bon teweaki nako nako nanon te ai are e ura maka ibukin te riaboro ma ana anera.
Ngkana ti karekea ara tai n tirobaea nanora ao man kataia n ukeri ba baikara baai ae a na kakukureia nanon te Atua ao ti na kunea ba e na bon kanganga ba ti na katebenakoi baai ake a buakaka mai nanora. Angiin te tai ao ti kunea ba ti aki kan kaoti ao man riba kaotakia ba ti rawa ae a na ataki arora aikai. Ao bon aikai ngkanne arora ake a na baireaki man motikaki taekara iai n tain te kaitira ni bong.
Ti bia bane n kaonaki n ana karatia te Atua ba ti na kona iai ni kaoti ni kabane buakakan nanora ao man kona ni karekea te raira n nano ni koaua n te tai aio ba ti aonga n urua ana tabo ni kamangang te riaboro ake a mena inanora ike e na tauira iai man tuka aron ara kaiokaki ma Atuara. Ti bia ururingnga ae te riaboro bon ti te kan kamaneira man tauira man te kamaeuaki ma Iesu bon tiaki nanona anne. E kan kamaeuira Iesu.
A bia matoa nanora ni kabane inanon te Karemo aio ba ti aonga ni kona n raona Iesu n tokanikai ma ngaia iaon ana kariri teuare e buakaka. Ti bia raonia tiibu ake a kamenaaki n anaatain Iesu ba e aong n reke iroura te maeu are akea tokina . Amen.