Au kamauri ao au katekeraoi nakoira ni kabane inanon moan wikin te karemo ae ti a tokaria ngkai. Bon au kantaninga ba e matata raoi nakoira ni kabane taian boto n iango are e kaukaki iai te karemo n toan te Mannang (Ash Wednesday). Bon iai teniua bai aika kakawaki nakoira inanon tain te karemo ba te tataro, te aki mamatam ao te angabai. N te bong aio ti a manga kauringaki iai arora n tataro ae ti riai ni karikirakea iroura, n ara utu ao n ara bobotaki nako. Ti riai n taai nako n neneboa te Atua ao ni kamoamoa ngkai boni Ngaia ae karikira ao a mena arora ni kabane inanon baina. Ti riai ni bane ni kakorakoraira ba ti na karokoa Ueana i aonteba n arora n neneboia ao n tauraoi ni karaoi muin ana Taeka ni kabane. Ao ana taeka ni kabane a bon rabatanaki iroun Iesu are riki n aomata ao ni maeka i buakora.
Ngkai bon Ngaia Atuara ae karikira ao ti bon riai n onimakinna ba Ngaia bon raora n taai nako ae tauraoi ni buokira ni kainnanora nako. Ai ngaia are ti bon riai n taai nako n aki toki ni butia buokara ibukin te bong teuana ma teuana. Ti riai ni maiuakini ara tataro n tauraoi ni kabarai aia bure akana a bure nakoira ngkai bon ti ngaia aio te anga ae a kona iai ni kabaraki ara bure iroun Tamara ae te Atua. Ti na bon kaitibo ma taian kaririaki n taai nako ao riki inanon te karemo aio ma ti riai ni kauki nanora nanora ni bubutia te Uea ba E na kakawakinira ni katoa bong riki man taian kaririaki.
Te bai riki teuana ae ti kauringaki n te bong aio boni kakawakin ana Taeka te Atua are kanga aiaron te karau are na baka mai karawa ni kamaitoroa aontano ba e aonga ni kariki ua. Ti bia bane naba ni wawarekea ana Taeka te Atua ao ni mamakuriia inanon ara tai ni karemo n tauraoi ni karaoi makuri n tangira ao n akoi nakoia tarira ma manera ni kabane.