Tariu ao maneu e teke nanou n ana taeka Iesu aikai ake ti anganaki inanon tain te karemo are bon ara tai ni keiakina te kabouaki inanon ara reitaki ma te Atua. Ti bon riai ni karaua raoi ni iangoia ba tera te bai ae ti kani butia te Atua inanon tain te karemo aio. Eng ti a tia n tuangaki ni kaukan te karemo ba ti riai n raeuai nanora ao tiaki ara kunikai; ti riai kabatia te tataro ao te aki mamatam ao ti riai n tauraoi ni karaoa ae raoiroi nakoia tarira ma manera.
Tera ngkanne te bai ae ko kani kaboua ni maium are na karaka riki tamaroan am kekeiaki n irira Iesu? I taku ba e na bon titebo au iango ma ngkami are te bai ae ti kainnanoia n te tai aio bon kamaeuara mani mamarara aika kakaokoro ake a tototkoa aron kabanean nanora n irira Iesu. Tera te bai ae ko tuai n tauraoi n angan te Uea ba e na tautaeka iai ni maium?
Ngkana arona ba ti kona n ninikoria n nora te mamarara are ti riai n angan te Uea n te tai aio ao ngkanne e na bon reke ara tai ni karemo aio ba te tai ae na rangi ni uana mani manena ibukira nakon ana kantaninga te te Atua ae moan baan te tamaroa ibukira ni kabane.
Tariu ao maneu ti na bitia te Uea ana karatia ba ti na kona n nori mamarara ake kainnanoa lamaeuakira ma iai ao ti na onimakina tauraoin te Uea n anganira baai ni kabane aika ti bubuti ngkai E atai baai aika a tamaroa ibukira. Bon te Uea te tia kairira inanon kawaira ni ukeueke n te maiu aio ao bon nanon raoi te Atua ba E na kauka te mataroa nakoira ngkana ti karebwerebwe ba ti aonga n rin inanon mimitongin te kabaia ma te kimareirei ae akea tokina i Karawa.