Kanan Tamneira...

Tariu ao maneu ao ti a ururinga kanoan te karemo are e kauringira te Ekaretia are bon te tauraoi n angabai ao ni buokia tarira ao manera. Ma antai aika ti na riai ni buokiia? E koaua ba ti na riai ni buokiia ake a kainnano ma ti kauringaki naba n te boki ae Tiraka ba ti riai n aki buokia aomata aika buakaka ba muina ao ti na tautaekanaki irouia. Ti riai naba n aki buokia aika a kabonakoi baai ngkoira riki ngkana ti aki ataia ba a reke ma ia baai aikanne. N tabetai ao a kaboaki nakoira baai aika kimoaki man te tabo teuana. Are nanona ngkanne ba ngkana ti kaboa ibukin ae ti kani buokiia ao ti na bon kaunga aroia ae aki tamaroa.
Ti kauringaba n te bong aio ba ti riai ni buokiia ake aki kona ni kaoka muin ara makuri n tangira. Are nanona ba ti riai n anga ara ibuobuoki tiaki ibukin reken arora ke kamoamoakira ma ti riai n anga ni katotonga te Atua ae tangiria aomata ni kabane. E bon tuangira te Ekaretia ba te makuri ni karemo ae moani baan te tamaroa bon karaoan te ibuouboki ao te makuri n tangira nakoia tarira ma manera.