Kanan Tamneira...

Bon iai ana Berita n Akoi te Atua ae ti na riai n aki nanououa iai ao are e a tia ni kaotia nakon Aberam, Nooa, Iakoba, Moote ao ngkai inanon Iesu ae Natina. Ti nora aron Abram n titirakina te Atua ba e na kanga n ataia ba boni ngaia te tia baibai n te aba are e anganna te Atua. E boni kaeka te Atua n angan Aberam te kanikina. N ana reta Bauro nakoia i Biribi ao ti tuangaki iai ba ba boni iai kaniwangara ni kabane ae moan te kakawaki ngkana ti teimatoa ni maiuakina Nanon te Uea. Ti na riki ba tan baibai ngaira n te Abanuea arei Karawa. E na biti rabatara man tabeki rabatara aika mangori mani mamate aikai nakon te mimitong. N te ewangkerio n te bong aio ao e katauira Iesu ba ti nora mimitongina n Atua ba te kanikina nakoira ibukin ana Berita n akoi te Atua are te maiu inanon te mimitong ma Ngaia i Karawa.
Ma e a tia ni kaoiti kawaira Iesu ni karekea kanoan ana Berita n Akoi nakoira te Atua. Ngkai bon ana botanaomata te Atua ngaira ti riai ni kairaki n taai nako n ana kawai ao ana tua ba ti aonga ni karekea kanoan te Berita n Akoi. Ti riai inanon te karemo aio ni butia te Uea ana buoka ba e na bitiira ba ti na kona ni barui riki bain te tamnei ao ni kainaomataaki man ana katikitiki ao ana kaririaki aonteaba –te kaubai , te kamoamoa ao te bakantang.