Tera te maan ae te ba baka n raoiroi ke te kakan raoiroi? Ti bae n tuangaki ba bon aia maan naake a aongkoa a ata te raoiroi ke a tataekina te raoiroi ma a bon aki ataia ke a bon aki kakaraoia. Ba a tuangko te bai ae raoiroi ba ko na karaoia ao a nako ngaiia ni karaoa ae bon kaaitaraana.
Ti ataia ba bon akea ae e raoiroi ba e tuangira Roma 3:10 ni kangai; " Bon akea te aomata ae e raoiroi, bon akea temanna." Ti ataia ikai ngkanne ba uake a reirei man buokira ni maeuna te maeu ae raoiroi bon taan bure naba ngaiia. Ma ibukina ba ti butimaea aio ao ti riai ngkanne n ongora nakon baai ake a tuangira ma ti na aki katotongi baai ake a karaoaia. Aei ae e na buokira ao ni buokia naba koraki aikai ni maeuna te maeu ae raoiroi.
N te moan wareboki ao e kauringira Itaia ba e aki toki ni weweteira te Uea ba ti na babaire ma Ngaia. Ba n te tai ni babaire aio ao E na bon kaitiakiira ba ngkana ti bareka man uraura man ara bure ao e na e na kamainainaira n aron te tinoo n aron ana taeka mai iroun Itaia.
E taetae nakoira te Uea n aron aio ba e tangirira, e kan kaotia nakoira ba bon natina ngaira, bon tarira ngaia ba bon aei aron te karo n taetae nakon natina ke te tari ae e ikawai nakon tarina ae e uarereke. Ba ngkana a maroro man babaire ao a uaia n taetae man reirei ba a na kaai n karikirakeaki n te raoiroi ma te kukurei.
N te wareboki naba ao ti kaurigaki aron kakawakin te ongotaeka ba e kakabaiaki ane e ongotaeka ao e katekebuakaaki ane e bonotaninga. Kanga aron te taongki are e kairaki nakon te aubunga n ran ma n aki kona ni imanonoaki ba e na mooi bon aron naba te Atua ae e tangirira, E na kairira nakon te baro n ran ma a na kantaninga ba ti na bon bane ni kibaria man mooi n aroia naati aika a mate n taka!