Uoua baai aika I ataia ba e ringa nanou iai te Uea n ana taeka n te bong aio. Teuana bon man te moan wareboki are e anaaki mai iroun te Burabeti ae Ieremia. E kauringira ba ngkana ti onimakina te Uea ao ti na karikiua aika a bati n aron te kai are e tei ietan te karanga man nako wakana nakon te ran ni katoa tai. E na bon aki rotaki n tain te aki kakarau ba e nim ma te ran.
Ai uana naba ma ngaira ngkana ti nim ma te Uea ao ti na bon kariki ua aika a bati n taai nako.
Te kauoua ba bon aron ana karaki Iesu ibukin te Kaubai ma Rataro. Ai kateke nanora aron ana karaki iesu aio. Eng, ni maeura aio ao ao ti tangiri baai ba a na reke iroura, ti mataaiakini bain te maeu aio. Ti taku ba ngkana a ravata ara bwai ao e tatangirira te Uea ao ngkana akea ara bwai ao ti taku ba ti aki rangi ni mutiakinaki. Ma I taku ba n ana taeka Aberaam nakon te Kaubai ngke e tangira buokana mai iroun te kakaawa are Rataro ao ti kauringaki iai ba n anganakira te kaubai ao ti bon riai n uringnga ba e tangirira te Uea ba ti na tibai ara bai aikai nakoia raora ti aong n aki reke n aron te Kaubai are e mate ao e a manga nora aron te kananoanga ni maeuna are imwina.
Ti a tataro ba ti aonga n anganaki te uki n nano n kan titibai kaubaira nakoia raora ao man butimaai ma te nano n karabaraba nakon te Uea ba ti kaotia iai ba a bon nako baai aikai mai irouna. Ko raba te Uea.