E rangi nikaunga kanoan Ana Taeka te Uea n te Tutia n te bong aio ma Kam na bane moa ni mauri n ana tangira ara Uea, tariu ao maneu n te moan Kanimabong aioi!
Ni warekan te moan wareboki ao I ongora ma uringan aron ana kakakaraki tibu nakoiu imwain matu! E rangi ni mate n kuna te karaki aio ba e aki toki ni kakaokiokia tibu ba e bon mamate naba nanona iai. Ngkana e karakina te rongorongo aei ao e bae n manga karakina rongorongoia taari ake Kain ao Abera. I nora rekreken karaki aikai ba a kaota aron te tangira ae e kaboaki mwiina n te bangaomata ma te tiritiri.
E ngae ngke e riki aio n ana tai Atam ao Nei Ewa ao rimwi riki n ana tai Iakoba ma ti ataia ba e bon riki naba n taai aikai. Ti ongongo rongorongoia taanga aika a tia ni maeka inanon te tai ae e maan man tib'aa aron aia tangira ma e kamimi ba e a manga bitaki te tangira aei nakon te kairiribai ae korakora ao e a roko n tokina ae ai te tiritiri ae e a karaoaki.
Ma ai rabara aron ana tangira Tamara te Atua ba ti ataia ae ngkana ti kabarai ara bure n aron ara makuri nako aikai ao E bon aki toki n tatauraoi ni butimaira man kabarai ara bure. Ti ataia ba te Atua bon te tangira ao ti ataia naba ba te riaboro bon te kairiribai ma te tiriaomata, ba e kangai te Atua nakoira: I tangiriko ao te riaboro e kangai N na tiringko.
Ao ngaia aei ae ti karaoia; E kanakomaia Natina ae te Rikitemanna te Atua ba e na kaota aron ana tangira ao ngaira ti ienikuri n tiringnga.
E bia riki te tai ni Karemo aio ba ara tai ni iangoa raoi aron ana tangira Tamara ae te Atua ibukira ao ni katauraoira raoi nakon tekamaeuaki are E na roko ma ngaia Natina are e mate ibukin kamaeuara.