E taku te Burabeti ae Otea nakoia Iteraera: Katauraoi ami taeka, okira Iawe, ao butia kabaraan ami bure ni kabane ao butimaea te nano ae e raoiroi. Otea 14: 3. Ti a tuanga Atuara ae Iawe ba E na anai ara karea nakoina ake karea ni kabuokaki ao man katauira ba ti na anganna nanora ni koaua ba ara karea. E kauringira naba te Tia Koroboki are e kaeka nakon Iesu ba ti bon riai n tangira te Uea ae Atuara n ti ngaia ma nanora ni kabanea ao ana iango ni kabanea ao korakorana ni kabanea, ao e na tangira raona n ai aron tangirana i boni irouna.
N te tai n rairannano aio ti bia bane ni kona ni manga kaiokaki ma Atuara n te nano ae e koaua, te tangira ae e kororaoi ao te iango ae moan te raoiroi. Korakorara bon ana bai n tangira te Atua nakoira ngaia are ti bia kona n manga kaokia nakoina ma te kantaninga ba e na bon manga kabanea arona ma tamaroana ibukira. E koaua ae n tain te Karemo ao ti riai ni karaurau n iangoa aron rikirakera inanon ana raoiroi te Atua ba ti aonga ni kona n kekerakea aron te maeu ae e tabu ao mani kona ni katotonga ara Uea ae e tabu man roairoi.
Ngkana ti karekea te kaiokaki ma ara Uea ao ti nakoina n te benetenia are ti kaota iai raraomara ibukin ara bure man motiki nanora ba ti na manga bon aki manga okiri bure aikai. Ma ai kamira ti manga bon bure naba ke ti manga bon okiri naba. Ma e raoiroi te Uea ao e anganira ana taeka ni karaunano ae moan te raoiroi. Iroun te Burabeti ae Otea makorona 14 ao kibuna ae 5 ao iroun naba te Burabeti ae Ieremia 3:22 e tuangira Atua ba E na kaokira nakoina, E na tangirira ma nanona ni koaua ao E na anganira te kakaonimaki ba e a toki unna.
Ti bia bane n ongo ana taeka aio ao man okiria ma te nano n tangira ni koaua.