Bon moan te kamimi aron kainanoakia aomata iroun te Uea! E bati ongorara aron weteaia aomata aika a aki raoiroi aroia ba a na makuri ibukin te Atua. I taetae ba bon ngai temanna ae I aki raoiroi ma I ataia ba iai weteau iroun te Uea ba N na makuri ibukina. Ma n te bong aio n te moan wareboki ao ti ongoraeakina rongorongon wetean teuare Tauro are Bauro ngkai iroun Iesu.
E bon ririaki Tauro ibukin rikoaia Kiritian ma bainikirinaia ngke e a weteia naba Iesu man titirakinna ni kangai: "Tauro, Tauro e aera ko bainikirinai?" E taekinaki ba Tauro n te tai anne e baka man ana aoti ba e aki kona moan te raneanea are e taraia ba e nako mai iai te bwana ni wewete arei. N tokina ao e aki kona n taratara Tauro ba e a mataki.
Ma e taetae Iesu nakon teuare Anania man tuangnga ba e na nako ni katoka baina iaon matan Tauro ba e aonga ni manga oki ana taratara. Ti ataia ba e bai n rawa teuare Anania ti ibukina ba e ata aron Tauro are bon ti te bainikiriniia Kiritian man iova nakoia. Ma e bon rangi n ongotaeka Anania ao e kukurei ni karaoa tuangana iroun te Atua ao e nako ni katoka baina iaon Tauro ao e manga kona n noraaba Tauro.
Ti bia kona naba ngaira n ongotaeka nakon weteara iroun te Uea.
N ongotaekara ao ti na kona iai ni kina Iesu ae bon ngaia te amarake ao te mooi ni koaua are ti na kanna ao n nimma ba ti aonga ni anganaki te maeu ae e aki totoki. Ni boong aikai n te wareboki ao e kamatata Iesu ba bon Ngaia te bwerena ni kamaeu. E tuangira ba ti na tangira te amarake mai Karawa ba e aki mamauna ma te amarake are mai iaon te aba e bon kai mauna. E kakarariki ana rongorongo Santo Ioane ma ti bon miiakina naba aron rabakauna n koroboki ibukina ba ti ota n te bai ae e taekinna nakoira.
Ti bia bane n tangira Iesu man bubutimwaia n te komunio ao man ururingnga n te Eukari ba e tiku iai ibukira. Ko bati n raba Iesu n am bai n tangira ae bon ngkoe ibukin kanan tamneira.